زێلینسکی جارێکی دیکە وادەی هەڵبژاردنی ئۆکراینا دوادەخات

ئاڤا نیوز

ڤۆلۆدیمێر زێلینسکی، سەرۆکی ئۆکراینا جارێکی دیکە داوا دەکات بۆ ماوەی 90 ڕۆژ هەڵبژاردنەکان دوا بخرێت، پەرلەمانیش دەڵێت پڕۆژەکەی ڕەتناکرێتەوە، چونکە هێشتا شەڕ لە وڵات بەردەوامە.

چیرۆکی سەرەکی: دوای ئەوەی خولی سەرۆکایەتیی زێلینسکی لە مانگی ئایاری 2024 کۆتایی هات، بەڵام بەهۆی هەبوونی جەنگ لە ئۆکراینا خولی سەرۆکایەتییەکەی درێژکرایەوە و نەتوانرا هەڵبژاردن ئەنجام  بدرێت، ئەمڕۆ جارێکی دیکە زێلینسکی داوای کرد هەڵبژاردن دوابخرێت.

ڕاگەیێنراوی فەرمی: سەرۆکی پەرلەمانی ئۆکراینا ڕایگەیاند:  پەرلەمان ئەو پڕۆژەیە ڕەتناکاتەوە  چونکە شەڕ بەردەوامە و بەشێکی خاکەکە بە داگیرکراوی ماوەتەوە، "ناکرێت گەرەنتی هەڵبژاردنی ئازاد و دادپەروەرانە بکرێت لە کاتێکدا وڵات بەردەوام بۆردوومان دەکرێت و ملیۆنان هاوڵاتی لە ناوخۆ و دەرەوە ئاوارەبوون ".

زانیاری بەدەستهاتوو: میدیاکانی ئۆکراینا بڵاویانکردەوە، ڤۆلۆدیمێر زێلێنسکی، سەرۆکی ئۆکراینا دوو پڕۆژەیاسای پێشکەش بە پەرلەمان کرد بۆ درێژکردنەوەی باری نائاسایی وڵاتەکەی بۆ ماوەی 90 ڕۆژی دیکە و لە 9ـی ئایار دەستپێدەکات تا 6ـی ئابی 2025، ئەمەش دەبێتە هۆی دواخستن و  ئەنجام نەدانی هەڵبژاردن.

ئەوەی پێویستە بیزانیت: بەپێی یاسای ئۆکراینا لە کاتی هەبوونی شەڕ لە وڵاتدا ڕێگە بە هیچ هەڵبژاردنێک نادرێت و ئەمریکاش چەندین جار پێویستیی ئەنجامدانی هەڵبژاردنی دووپاتکردووەتەوە.

ئەمەش بزانە:  پێشتر دۆناڵد ترەمپ، سەرۆکی ئەمریکا زێلینسکی بە "دیکتاتۆرێکی هەڵنەبژێردراو" وەسف کردبوو و ڤلادیمێر پووتینیش دانیشتنی لەگەڵ زێلێنسکی ڕەتکردووەتەوە و بە سەرۆکێکی نا شەرعی ناساندووە.