ئاڤا گەندەڵییەکی گەورە لە دەروازەی باشماخ ئاشکرا دەکات

ئاڤا نیوز

ئاڤا لە دەروازەی باشماخ زیاتر لە دوو ملیۆن دۆلار دیار نەماوە، بۆ ئەم مەبەستە چوار کۆمپانیای گەورە کە لەلایەن بەرپرسێکی باڵای یەکێتییەوە سەرپەرشتی دەکرێت لەو بابەتە تێوەگڵاون.

وێنە گەورەکە: لە گومرگی دەروازەی نێودەوڵەتیی باشماخ، بڕی دوو ملیۆن و 400 هەزار دۆلار كە دەكاتە 240 دەفتەر دیارنەماوە، چوار كۆمپانیای گەورەی هاوردەكردنی ئۆتۆمبێل تێوەگلاون، بە واستە و بەرتیلدان پارەی گومرگانەیان نەداوە.

زانیاریی تایبەت: سەرچاوەیەكی ئاگادار لە بابەتەكە بە ئاڤا میدیای ڕاگەیاند، ئەو چوار كۆمپانیایە لەلایەن بەرپرسێكی باڵای یەكێتییەوە سەرپەرشتییان دەكرێت و چاوپۆشییان لە پارەی گومرگ لێكراوە، دوای ئەوەی بابەتەكە ئاشكراش بووە هیچ كەسێك لە خاوەن و سەرپەرشتیاری كۆمپانیاكان و بەرپرسانی گومرگ دەستگیر نەكراون، بەڵكو تەنیا كارمەندێكی بەشی ژمێریاری گومرگی باشماخ  دەستگیركراوە و ئەویش هەر زوو ئازاد كراوە.

ئەوەی پێویستە بیزانیت: ناوی كۆمپانیاكان و ئەو بەرپرسەی كە خاوەنیانە و هەروەها ئەو كارمەندەشی كە دەستگیر كراوە لە لای ئاڤا میدیا پارێزراون و هەر چواریان هی بەرپرسێكی باڵای یەكێتین، هەر ئۆتۆمبێلێكیان هاوردە كردووە یەك فلسیان نەداوە بە حكوومەت، سەرچاوەكە دەشڵێ ئۆتۆمبێلەكان چینی و ئەمریكی بوونە، دوو كۆمپانیا ئۆتۆمبێلی چین و دووانەكەی دیكەش ئۆتۆمبێلی ئەمریكییان هاوردە كردووە.

ئەمەش بزانە: ئەو كۆمپانیایانە كاتێك ئۆتۆمبێلەكانیان هاوردە كردووە لەڕێگەی چەند بەرپرسێكی دەروازەكە و كارمەندێكی ژمێریاری گومرگی باشماخەوە وەسڵی تەزویریان بۆ كراوە بەبێ ئەوەی پارە بدەن لە كۆمپیتەر داخڵیان كردووە و ئەو ژمارە فەیكانەی كە تۆماریان كردووە نێردراون بۆ وەزارەتی دارایی، ئێستا كە كەیسەكە ئاشكرا بووە هەمان بەرپرس خەریكی داخستن و پەردەپۆشكردنی كەیسەكەیە.