ڕێگرییەکانی سوپا گەنجانی سەرگەڕانی ناچارکردووە بەرەو شار کۆچ بکەن

ئاڤا نیوز

سەرەڕای هەڵوەشاندەنەوەی بڕیارەکانی ئەنجوومەنی سەرکردایەتی شۆڕش (مجلس قیادة الثورة)ی بەعس، بەڵام جووتیارانی ناحیەی سەرگەڕان لە پارێزگای کەرکووک هێشتا ناتوانن زەوییە کشتوکاڵییەکانیان بۆ کێلان بەکار بهێنن. گەنجانی ناوچەکەش ناچارن گوندەکانیان بەرەو شار چۆڵ بکەن.

لێدوانی فەرمی: دەشتی خدر، جووتیارێکی گوندی شەناغەیە، لە باوانییەوە هەزار دۆنم زەوی بۆ ماوەتەوە، بۆ ئاڤا میدیا دەڵێت، لەو هەزار دۆنمە تەنها 50 دۆنمی کێشەی لەسەرە و سوپای عێراق ڕێگەی پێنادات ئەو 950 دۆنمەی کێشەی لەسەر نییە بەکاری بهێنێت و کشتوکاڵی لەسەرە.

ئەوەی لەوبارەیەوە دەگوترێت: لە دوای ڕووداوەکانی گوندی شەناغە داوا لە جووتیاران کرا تەنها مانگێک دەست لە کێڵانی زەوییەکانیان هەڵبگرن تا کێشەکەیان بۆ چارەسەر دەکرێت، بەڵام وا نزیکەی دوو مانگ تێپەڕ دەبێت و سوپا ڕێگرە لە کێڵانی زەوییەکان و کێشەی جووتیارانی کورد تائێستا چارەسەر نەکراوە.

ئەوەی پێویستە بیزانیت: زیاتر لە ساڵيکە سوپای عێراق فشارەکانی لەسەر جووتیارانی کورد توند کردووەتەوە و ڕێگە بە جووتیاران نادات لەسەر زەوییە کشتوکاڵییەکانیان کار بکەن، ئەمەش وای کردووە بەشێکی زۆری گەنجانی گوندەکانی ناحیەی سەرگەڕان لە بێ کاریدا گووندەکان جێ بهێڵن و بەرەو شار کۆچ بکەن.

زانیاریی زیاتر: بەپێی هەردوو بڕیاری ئەنجوومەنی سەرکردایەتی شۆڕش و لیژنەی کاروباری باکوور، یەک ملیۆن و دووسەد هەزار دۆنم زەویی جووتیارانی کورد زەوتکراون، لەو ژمارەیەش 40 هەزار دۆنم زەوی دەکەوێتە سنوری گوندەکانی ناحیەی سەرگەڕان، سەرەڕای هەڵوەشاندنەوەی بڕیارەکانی بەعسیش ئاسۆی چارەسەر کردنی کێشەی ئەم زەوییانە ڕوون نییە.