دووەم حاڵەتی گیانلەدەستدان بەهۆی تای خوێنبەربوون تۆمار کرا

ئاڤا نیوز

 

دووەم حاڵەتی گیانلەدەستدان بەهۆی تووشبوون بە تای خوێنبەربوون لە سنووری پارێزگای كەركووك ڕاگەیێنرا.

 

وێنە گەورەکە: چەندین حاڵەتی تووشبوون و مردن بە هۆی پەتای تای خوێنبەربوون لە شارەکانی ناوەڕاست و باشووری عێراق بڵاوبوونەتەوە و ڕۆژی پێنجشەممەی ڕابردوو چەند حاڵەتێکی تووشبوون بە پەتاکە لە شاری کەرکووک ڕاگەیێنران.

 

زانیاریی پەیامنێر: ڕۆكان مەحموود، پەیامنێری ئاڤا لە كەركووك ڕایگەیاند، بەرەبەیانیی ئەمڕۆ گەنجێك كە کارمەندی نەخۆشخانەی گشتیی كەركووكە بە هۆى تووشبوون بە پەتای تاى خوێنبەربوون گیانی لەدەست دا.

 

زانیاریی زیاتر: كارمەندەكەی نەخۆشخانەی گشتیی كەركووك ناوی یادگار نوورییە.

 

ئەوەی پێویستە بیزانیت: تەندروستیی كەركووك دوێنێ هەینی تۆماركردنی دوو حاڵەتی نوێی تووشبوون بە پەتای تای خوێنبەربوون لە سنووری پارێزگاكە ڕاگەیاند.

 

ئەمەش بزانە: ڕۆژی پێنجشەممە یەكەم حاڵەتی گیانلەدەستدان بەهۆی پەتای تای خوێنبەربوون لە كەركووك ڕاگەیێنرا و تاوەكوو ئێستا لە سنووری ئەو پارێزگایە چوار حاڵەتی تووشبوون بە پەتاكە تۆمار كراوە كە دوو كەسیان گیانیان لەدەست داوە.

 

باكگراوند: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، لە چەندین پارێزگای دیکەی عێراق تۆمارکراوە و چەندین کەسیش بەو نەخۆشییە گیانیان لەدەستداوە.