ڕووسیا، ئۆکراینا بە شکاندنی ئاگربەست تۆمەتبار دەکات

ئاڤا نیوز

 

وەزارەتی بەرگری ڕووسیا بەرپەرچدانەوەی هێرشەکانی ئۆکراینا ڕادەگەیەنێت و کیێڤ بە شکاندنی ئاگربەست تۆمەتبار دەکات.

 

وێنە گەورەکە: دوای داواکاری دۆناڵد ترەمپ، سەرۆکی ئەمریکا بۆ پیشاندانی ویستی ڕاستەقینە بۆ گەشتن بە ئاشتی لە نێوان ئۆکراینا و ڕووسیا، ڤلادیمێر پووتین، سەرۆکی ڕووسیا " جەژنی ئیستەر" ی وەک دەرفەتێک بەکارهێنا و بەو بۆنەیەوە ئاگربەستێکی 30 کاتژمێری لەگەڵ ئۆکراینا ڕاگەیاند، بەڵام ئەمڕۆ یەک شەممە وەزارەتی بەرگری ڕووسیا لە بڵاوکراوەیەکی فەرمیدا کیێڤ بە شکاندنی ئاگربەست تۆمەتبار دەکات. 

 

بڵاوکراوەی فەرمی: وەزارەتی بەرگری ڕووسیا ڕایگەیاند: سەرەڕای ڕاگەیاندنی ئاگربەست لە لەیەن سەرۆک پووتینەوە بەڵام هێزەکانی ئۆکراینا لە ناوچەکانی سوخایا بالکا و بوگاتیر لە هەرێمی دۆنێتسک هێرشیان کردۆتە سەر سەربازانی ڕووسیا، لە شارەکانی کورسک و بریانسک و بێلگۆرەد هێرشەکانیان بووەتە هۆی کوژران و برینداربوونی هاوڵاتیان، کیێڤ پابەندی ئاگربەست نەبوو.

 

زانیاریی زیاتر:  وەزارەتی بەرگری ڕووسیا ڕایگەیاند، کیێڤ بە 48 مووشەک هێرشی کردۆتەسەر دورگەی کریمیا، ڤلادیمێر پووتین فەرمانی بە سوپای ڕووسیا کردووە بەرپەرچی هەر هێرشیک بدرێتەوە و لە بەرامبەردا هێزەکانی ڕووسیا بە تووندی وەڵامی هێرشەکەی ئۆکراینایان داوەتەوە.

 

لەلایەکی دیکەوە: ڤۆلۆدیمێر زێلێنسکی، سەرۆکی ئۆکراینا ڕایگەیاند، فەرمانی بە سوپای ئۆکراینا کردووە بۆ وەڵامدانەوەی هەر هێرشێکی ڕووسیا بۆ سەر خاکی ئۆکراینا.