ئەمریکا گەورەترین کونسوڵخانەی لە جیهاندا لە هەولێر دەکاتەوە

ئاڤا نیوز

لە کۆتایی ئەمساڵدا ئەمریکا گەورەترین کونسوڵخانەی وڵاتەکەی لە جیهاندا لەهەولێر دەکاتەوە. لەلایەکی دیکەوە، ترەمپ بڕیاریداوە 30 کونسوڵخانە و باڵیۆزخانەی وڵاتەکەی لە تەواوی جیهان دابخات.

وێنە گەورەکە: داخستنی ئەم باڵیۆزخانە و کونسوڵخانانە لەچوارچێوەی هەوڵەکانە بۆ کەمکردنەوەی خەرجییەکانی وەزارەتی دەرەوەی ئەمریکا، بەڵام لەگەڵ ئەوەی کونسوڵخانەکەی لە هەولێر گەورەترینە و خەرجی زۆرە، داناخرێت.

ئەوەی پێویستە بیزانیت: چاوەڕوان دەکرێت لە کۆتایی ئەمساڵدا بەئامادەبوونی بەرپرسانی باڵای ئەمریکا و کوردستان گەورەترین کونسوڵخانەی ئەمریکا لە جیهاندا لەهەولێر بکرێتەوە.

لێدوانی فەرمی: وتەبێژی کونسوڵخانەی ئەمریکا لە هەولێر بە ئاڤای گوتووە، "کۆتایی ئەمساڵ کونسوڵخانە تازەکەمان لەهەولێر دەکەینەوە، ئەمەش نیشانەی پابەندبوونی ئەمریکایە بەهاوبەشیکردنی لەگەڵ هەرێمی کوردستان".

لەبارەی پێکهێنانی حکومەتی نوێی هەرێمی کوردستانیش دەڵێت:

- حکومەتێکی بەهێز و خۆڕاگری هەرێمی کوردستان پێویستە بۆ ئاسایش و سەقامگیری عێراق. 

- داوا دەکەین بە خێرایی کابینەی نوێی حکومەتی هەرێمی کوردستان پێکبهێندرێت.

- لەبارەی هەناردەکردنەوەی نەوتی کوردستانیش ئەڵێ، "داوا لە هەردوو حکومەتی عێراق و کوردستان و کۆمپانیاکان دەکەین، لە نزیکترین کاتدا لەسەر کردنەوەی بۆڕی نەوتی عێراق - تورکیا ڕێکبکەون.  

- ئەمریکا بەردەوامە لە داکۆکیکردن لە بازرگانی و وەبەرهێنانەکانی ئەمریکا لە عێراق، بەو پێیەی ئێمە پێمان وایە کە ژینگەیەکی بازرگانی تەندروست کە ڕێز لە گرێبەستەکان بگرێت، هاوتەریب بێت لەگەڵ ستانداردە نێودەوڵەتییەکان و ڕێگە بە گەشەسەندنی بازرگانی بدات بۆ هەمووان باشە.

- هاوکات پشتیوانی لە هەوڵەکانی حکومەتی عێراق بە حکومەتی هەرێمی کوردستانیشەوە  دەکەین بۆ چاودێریکردن و گرتنەبەری کردەوە لەدژی ئەو گروپە تیرۆریستییانە کە ڕەنگە هەوڵی دۆزینەوەی پەناگەیەکی ئارام لە عێراق بدەن.