دوای 28 ڕۆژ لە ونبوونی عومرەکارێکی کورد لە سعوودیە دەدۆزرێتەوە

ئاڤا نیوز

عومرەکارێکی کورد دوای 28 ڕۆژ لە ونبوونی لە سعودیە، دۆزرایەوە و دەگەڕێنرێتەوە کوردستان، بڕیارە لەگەڵ یەکەم وەجبەی عومرەکاران بگەڕێنرێتەوە کوردستان و بە خانەوادە و کەسوکاری شادبێتەوە.

چیرۆکی سەرەکی: محەممەد ئیسماعیل هاووڵاتییەکی نیشتەجێی ناحییەی حاجی ئۆمەرانە، خێزاندارە و نەخۆشی لەبیرچوونەوەی هەیە. لە مانگی ڕەمەزانەوە بەمەبەستی عومرەکردن لەڕێگەی کۆمپانیایەکەوە لەگەڵ خوشک و برای خێزانی چووەتە سعوودیە، بڕیار بوو جەژن بگەڕێنەوە، بەڵام لەوێ ون دەبێت، دوای چەند ڕۆژێکیش لە گەڕان بەدوایدا دوو خزمەکەی بێئومێد دەبن لە دۆزینەوەی و دەگەڕێنەوە. 

هەرچەندە 17ی ئەم مانگە دوای بڵاوکردنەوەی هەواڵی ونبوونی لە ئاڤا دۆزرایەوە، جارێکیش پێش ئەوکات ڤیدیۆیەکی لە تۆڕە کۆمەڵایەتییەکان بڵاوبووەوە، بەڵام  دواتر ون دەبوویەوە.

ئەوەی پێویستە بیزانیت: بەهۆی نزیکبوونەوەی وادەی حەج ئێستا پێدانی ڤیزای سعوودیە قورس بووە، بۆیە خانەوادەکەی نەیانتوانیوە لە کوردستانەوە بچنە ئەو وڵاتە بۆ دۆزینەوەی، وەک  د. حەسەن، ئامۆزای محەممەد ئیسماعلیل بە ئاڤای گوت، براکەی لە بەریتانیاوە چووەتە سعوودیە و لەگەڵ تیمەکانی حەج و عومرە بەدوایدا گەڕاون تاوەکو دۆزیویانەتەوە.

لێدوانە فەرمییەکان: یوسف ئەحمەد، بەرپرسی نووسینگەی حەج و عومڕەی ئیدارەی سەربەخۆی سۆران بە ئاڤای گوت، "ئێستا لە هەوڵداین پاسپۆرت و ڤیزای بۆ وەربگرینەوە، لەگەڵ یەکەم وەجبەی عومرەکاران هەماهەنگی بۆ دەکەین و دەگەڕێتەوە کوردستان."

هاوکات کاروان ستوونی، گوتەبێژی حەج و عومرەی کوردستان بە ئاڤای گوت: "لێپێچینەوەیان لەگەڵ ئەو کۆمپانیایە کردووە کە گەشتی بەو عومرەکارە کردووە چۆن جێیان هێشتووە".

ئەوەی پێشنیاز دەکرێت: لایەنە پەیوەندیدارەکان خەڵکی کوردستان ئاگادار دەکەنەوە، ئەگەر لە هەموو ڕووێکەوە لە تەندروستی کەسێک دڵنیا نەبن، ڕێگەیان پێنەدەن بچن بۆ حەج و عومرە، بۆ ئەوەی ڕووداوی هاوشێوە دووبارە نەبێتەوە، چونکە دۆزینەوەی کەسێک لەنێو دەیان و سەدان هەزار عومرەکار و حەجخواز کارێکی قورسە.