لە عێراق ژمارەی توشبووان و مردن بە تای خوێنبەربوون بەرزدەبێتەوە

ئاڤا نیوز

وەزارەتی تەندروستی عێراق ڕایگەیاند، ژمارەی توشبووانی تای خوێنبەربوون لە وڵاتدا بۆ 22 توشبوو بەرزبوونەتەوە و سێ توشبووش گیانیان لەدەستداوە.

مەترسییە زانراوەکان: تای خوێنبەربوون بۆ مرۆڤ هەندێکجار مەترسیدارە، چونکە زیان بە موولوولە تەنکەکانی خوێن دەگەیەنێت و دووچاری خوێنبەربوونیان دەکات، جگە لەوەش ڤایرۆسەکە ئاستەنگی لەبەردەم خوێن دروست دەکات و ئەوەش خوێنبەربوونی ناوخۆیی لێ دەکەوێتەوە، دواتر دەبێتە مەترسیی لەسەر ژیانی کەسی تووشبوو.

لێدوانی فەرمی: د. سەیف بەدر، وتەبێژی وەزارەتی تەندروستی عێراق ڕایگەیاند، لە پارێزگای موسەننا توشبوویەکی دیکەی تای خوێنبەربوون گیانی لەدەستداوە، بەوەش تائێستا کۆی توشبووانی نەخۆشییەکە 22 کەسن و سێ توشبووش گیانیان لەدەستداوە.

لەلایەکی دیکەوە: وەزارەتی تەندروستی عێراق بۆ ڕێگریی لە بڵاوبوونەوەی نەخۆشییەکە ئەم پێنج ڕێنماییەشی بڵاوکردووەتەوە:

یەکەم: ڕێگری بکرێت لەوەی ئاژەڵان لەنێوان شارەکاندا هاتووچۆ بکەن.

دووەم: سەربڕینی ئاژەڵان لە ژێر ڕێنمایی و چاودێریی وردیی تەندروستیدا ئەنجام بدرێت.

سێیەم: بەخێوکردنی ئاژەڵ لەناو شارەکان قەدەغە بکرێت.

چوارەم: هەڵمەتی فراوان و بەردەوامی کوتانی ئاژەڵان ئەنجام بدرێت.

پێنجەم: جیاکردنەوەی ئاژەڵە توشبووەکان لە ئاژەڵە ساغەکان.