عێراقچی: دانوستاندنەکان لەگەڵ واشنتن بە ئاراستەیەکی دروست دەڕۆن

ئاڤا نیوز

 

وەزیری دەرەوەی ئێران دەڵێت، دانوستاندنە ئەتۆمییەکان لەگەڵ واشنتن بە ئاراستەیەکی باش و دروستدا دەڕۆن.

 

وێنە گەورەکە: ئەمریکا و ئێران دوو گەڕی دانوستاندنی ناڕاستەوخۆیان سەبارەت بە بەرنامە ئەتۆمییەکەی ئێران لە عومان و ڕۆما بە نێوەندگیری وەزیری دەرەوەی عومان ئەنجامداوە. هەر دوو وڵاتیش دانوستانەکانیان بە بەرهەمدار و بوونیادنەر وەسف کردووە.

 

لێدوانی فەرمی: ڕۆژی چوارشەممە 23-4-2025، عەباس عێراقچی، وەزیری دەرەوەی ئێران رایگەیاند: هێشتا زووە بۆ بڕیاردان لەسەر دەرئەنجامی دانوستاندنە ئەتۆمییەکان لەگەڵ ئەمریکا بەڵام بە ئاراستەیەکی باش و دروستدا دەڕۆن.

 

لەلایەکی دیکەوە: بڕیار بوو ئەمڕۆ کۆبوونەوەی شاندی تەکنیکی نێوان ئێران و ئەمریکا بەڕێوەبچێت، بەڵام وەزارەتی دەرەوەی ئێران ڕایگەیاند، کۆبوونەوەکە کە بڕیار بوو  ئەمڕۆ چوارشەممە بکرێت بۆ ڕۆژی شەممەی داهاتوو دواخراوە.

 

زانیاریی زیاتر: یەکەم گەڕی دانوستاندنە ناڕاستەوخۆکان لە مەسقەتی پایتەختی عومان، دووەم گەڕی دانوستاندن لە ڕۆمای پایتەختی ئیتاڵیا بەڕێوەچوون، بڕیارە گەڕی سێیەمیش هەر لە عومان بەردەوام بن.

 

باکگراوند: لە دوای ساڵی 2018ـەوە دوای ئەوەی دۆناڵد ترەمپ، سەرۆکی ئەمریکا بە شێوەیەکی تاکلایەنە لە ڕێککەوتنی ئەتۆمی لەگەڵ ئێران کشایەوە، ئەم دانوستاندنانە یەکەمین دانوستاندنن لەم ئاستەدا لە نێوان هەردوو وڵاتدا ئەنجامبدرێن.