ئەمریکا و ئۆکراینا لە بەریتانیا دانوستاندن دەکەن

ئاڤا نیوز

 

ئەمڕۆ چوارشەممە بەریتانیا میوانداری خولێکی نوێی دانوستاندن دەکات کە ئەمریکا و ئۆکراینا و وڵاتانی ئەوروپی تیایدا بەشداری دەکەن، ئەمەش لە کاتێکدایە هەوڵەکانی ئەمریکا بۆ کۆتاییهێنان بە شەڕی ڕووسیا و ئۆکراینا بەردەوامە.

 

وێنە گەورەکە: دۆناڵد ترەمپ، سەرۆکی ئەمریکا لە کاتی بانگەشەی هەڵبژاردنەکانیدا بەڵێنیدا لە ماوەی 24 کاتژمێردا ئاگربەست لە نێوان مۆسکۆ و کیێڤ ڕابگەیێنێت، بەڵام تائێستا ڕووسیا بە پێشنیازی ئاگربەستی 30 ڕۆژەی ئەمریکا ڕازی نەبووە و لە هێرشەکانی بۆ  سەر ئۆکراینا بەردەوامە.

 

زانیاریی زیاتر: دەیڤید لامی، وەزیری دەرەوەی بەریتانیا سەرۆکایەتی دانوستاندنەکان دەکات و، هەریەکە لە کیس کیلۆگ، نوێنەری تایبەتی ترەمپ بۆ ئۆکراینا و ئیمانوێل بۆن ڕاوێژکاری دیپلۆماسی و ئیمانوێل ماکرۆن، سەرۆکی فەرەنسا لە کۆبوونەوەکەدا بەشدارن.

 

لەلایەکی دیکەوە: لایەنی ئۆکرانیا بە نوێنەرایەتیی ئەندری یەرماک، بەڕێوەبەری نووسینگەی سەرۆکایەتیی ئۆکراینا و ئەندری سیبیها، وەزیری دەرەوە و ڕوستەم ئومێرۆڤ، وەزیری بەرگریی ئۆکراینا بەشداری دەکەن.

 

ئەوەی پێویستە بیزانیت: کۆبوونەوەکەی لەندەن لە کاتێکدایە کە ڕاپۆرتە میدیاییەکان ئاماژە بەوە دەکەن کە ترەمپ ئامادەیە کریمیای لکێنراو بە مۆسکۆ وەک خاکی ڕووسیا بناسێنێت.

 

ئەوەش بزانە: بڕیارە لەم هەفتەیەدا ستیڤ ویتکۆف، نوێنەری تایبەتی سەرۆکی ئەمریکا بۆ ڕۆژهەڵاتی ناوەڕاست سەردانی ڕووسیا بکات، کە ئەمە چوارەم سەردانی نوێنەرەکەی ترەمپە بۆ ئەو وڵاتە لەو کاتەوەی دۆناڵد ترەمپ بووەتەوە سەرۆکی ئەمریکا.