لەسەر حەشدی شەعبی شەقامی عێراق و لوبنان وەڵامی یەکتریی دەدەنەوە

ئاڤا نیوز

 

کاردانەوەکان لەبارەی لێدوانەکەی جۆزیف عۆن، سەرۆکی لوبنان لەبارەی حەشدی شەعبی بەردەوامە. پیاوێکی ئاینیی شیعەکانی عێراقیش بە نابراو دەڵێت، "تۆ کەسێکی گرنگ و دیارنیت تا قسە لەسەر حەشد بکەیت"، هاوکات هاوکارییەکانی عێراقیش بە بیر خەڵکی لوبنان دەهێنێتەوە.

 

چیرۆکی سەرەکی: 16ی ئەم مانگە سەرۆکی لوبنان داوای لە حزبوڵڵا کردبوو چەک دابنێن، ئاشکراشی کردبوو کە دەکرێت ئەندامەکانی حیزبوڵڵا لەناو سوپادا جێگەیان بکرێتەوە بەڵام ئەزموونی حەشدی شەعبی لە عێراق دووبارە ناکەنەوە و حیزبوڵڵا وەک دامەزراوەیەکی سەربازیی نابێتە بەشێک لە دەوڵەت، بۆیە  ئەم لێدوانە کاردانەوەی لێکەوتەوە و وەزارەتی دەرەوەی عێراق باڵیۆزی لوبنانی لە بەغدا بانگهێشت کرد و نامەی ناڕەزایی پێدا.

 

لێدوانی فەرمی: دوایین کاردانەوەش لێدوانێکی یاسین موسەوی، یەکێک لە مەرجەعە ئاینییەکانی شیعەیە لە عێراق، کە لە وتارێکدا سەرۆکی لوبنانی بە کەسێکی "نادیار و ناگرنگ" وەسف کرد تا قسە لەسەر حەشدی شەعبی بکات، داواشی لە لوبنانییەکان کرد ئەو کاتانەیان لەبەرچاوبێت کە عێراق تاکە دەوڵەت بوو هاوکاریی وڵاتەکەیانی دەکرد.

 

لەلایەکی دیکەوە: ڕۆژنامەی ئەلنەهاری لوبنانی بڵاویکردەوە، لەسەر لێدوانی ئەو پیاوە ئاینییەی عێراق و "بێڕێزیکردن"ی بە سەرۆکی وڵاتەکەیان، تائێستا وەزارەتی دەرەوە ڕێکاری نەگرتووەتەبەر و باڵیۆزی عێراقی لە بەیروت بانگهێشت نەکردووە.