ڕووسیا: ناردنی هێزی ئاشتیپارێزی ئەوروپا بۆ ئۆکراینا هۆی هەڵگیرسانی جەنگی جیهانی سێیەم دەبێت

ئاڤا نیوز

 

سکرتێری ئەنجوومەنی ئاسایشی نیشتیمانی ڕووسیا ڕایدەگەیەنێت لە ئەگەری هەر هێرشێکی ڕۆژئاوا بۆ سەر خاکی ڕووسیا و ناردنی هێزی سەربازی بۆ ئۆکراینا، بە چەکی ئەتۆمی وەڵامی هێرشەکان دەدەنەوە.

 

وێنە گەورەکە: بەکارهێنانی چەکی ئەتۆمی لە یەکلایکردنەوەی جەنگی نێوان ڕووسیا و ئۆکراینا، مەترسییەکە هەمیشە ئەوروپا خۆی لێدەپارێزێت و ڕووسیاش بە ئەگەرێکی کراوەی دادەنێت بۆ بەرگریکردن لە خاک و سوپای وڵاتەکەی، لە دواین هەڵوێستی ڕووسیا سەبارەت بە ئەگەری هێرشی ئەوروپا بۆ سەر ڕووسیا و ناردنی ‌سەربازی وڵاتانی یەکێتیی ئەوروپا بۆ ئۆکراینا، سێرگی شۆیگۆ، سکرتێری ئەنجوومەنی ئاسایشی ڕووسیا هەڕەشەی بەکارهێنانی چەکی ئەتۆمی دەکات.

 

لێدوانی فەرمی:  سێرگی شۆیگۆ، سکرتێری ئەنجوومەنی ئاسایشی ڕووسیا لە لێدوانێکیدا بۆ میدیاکانی ڕووسیا ڕایگەیاند، ڕووسیا پارێزگاری لە مافی خۆی دەکات وەک وڵاتێکی خاوەن چەکی ئەتۆم و لە ئەگەری هەر هێرشێکی وڵاتانی ڕۆژئاوا بۆ سەر خاکی ڕووسیا ئەوە وەڵاممان بە چەکی ئەتۆمی دەبێت، هەموارکردنەوەی پەیڕەو و باوەڕی ئەتۆمی ڕووسیا لە ساڵی ڕابردوودا ڕێگە بە سوپای ڕووسیا دەدات لە ئەگەری هێرشی دەرەکی بۆ سەر خاکی ڕووسیا و بیلاڕووسیا، بە چەکی ئەتۆمی بەرگری لە هەردوو وڵات بکەین.

 

زانیاریی زیاتر: سکرتێری ئەنجوومەنی ئاسایشی ڕووسیا ڕایشیگەیاند، ناردنی هێزی " ئاشتی پارێز " بۆ خاکی ئۆکراینا لەلایەن بەریتانیا و ئەوروپاوە دەبێتە هۆی پێکدادانی سەربازی لە نێوان هێزەکانی ڕووسیا و ناتۆ و ئەمەش ئاراستەکردنی جیهانە بۆ جەنگی جیهانی سێیەم.

 

ئەوەی پێویستە بیزانیت: لە مانگی 11ی 2024 ڤلادیمێر پووتین، سەرۆکی ڕووسیا واژۆی لەسەر هەمواری باوەڕی ئەتۆمی ڕووسیا کرد.