وەزارەتی تەندروستی لەبارەی گیانلەدەستدانی شۆخان عەبدوڵڵا لیژنەیەکی لێکۆڵینەوەی پێکهێنا

ئاڤا نیوز

 

وەزارەتی تەندروستی هەرێمی کوردستان، لیژنەی لێکۆڵینەوەی لەسەر ڕووداوی گیانلەدەستدانی ئەو نەخۆشەی نەشتەرگەری دەرهێنانی چەوری بۆ کرابوو، پێکهێنا.

 

چیرۆکی سەرەکی: شەوی سێشەممەی ڕابردوو، کەسێک بەناوی 'شۆخان عەبدوڵڵا' لە نەخۆشخانەی سەفینی تایبەت لە سلێمانی نەشتەرگەریی دەرهێنانی چەوری بۆ کرا، بەڵام بەوهۆیەوە گیانی لەدەست دا.

 

ڕاگەیێنراوی فەرمی: ڕۆژی پێنجشەممە 24-4-2025، وەزارەتی تەندروستیی هەرێمی کوردستان ڕایگەیاند: لیژنەیەکی لێکۆڵینەوە لە بەڕێوەبەرایەتیی گشتیی تەندروستیی سلێمانی پێکهێنراوە، بۆ ئەوەی لێکۆڵینەوە لەسەر کێشەی گیانلەدەستدانەکەی بکرێت.

 

زانیاریی زیاتر: بەگوێرەی ڕاگەیێنراوەکەی وەزارەتی تەندروستی، د.ئارام عەبدوڵڵا محەممەد کە ناونیشانی پزیشکی پسپۆڕی نەشتەرگەریی گشتییە، لە کارەکانی ڕادەگیرێت تا کۆتاییهاتنی کاری لیژنەکە، چونکە ناوبراو سەرپێچی ڕێنمایی ژمارە 10ی ساڵی 2024 و فەرمانی وەزاری ژمارە 4304ی لە ڕێکەوتی 3-7-2023 کردووە و ئەم جۆرە نەشتەرگەرییانە پسپۆڕیی ئەم پزیشکە نییە.

 

لەلایەکی دیکە: هەرچی پەیوەستە بەو نەخۆشخانەیەی نەخۆشە تیایدا گیانی لەدەست داوە، وەزارەتی تەندروستی دەڵێت، بەهۆی سەرپێچیکردنی یاسا و ڕێنماییەکان تایبەت بە نەبوونی ڕێگەپێدانی کارکردنی پزیشکی ناوبراو لە لیستی میلاکی نەخۆشخانەکە، پێبژاردن بە نەخۆشخانەی 'سەفین'ی تایبەت لە شاری سلێمانی دەکرێت.

ئەوەی پێویستە بیزانیت: وەزارەتی تەندروستی بڕیاریداوە، "لە پێناو سەلامەتیی نەخۆش و چارەسەرییەکانی، هۆڵەکانی نەشتەرگەری لە نەخۆشخانەی سەفین دادەخرێن".