وەزیری خوێندنی باڵا لەبارەی بەدواداچوونێکی ئاڤا ڕوونکردنەوە و دڵنیایی دەدات

ئاڤا نیوز

 

وەزیری خوێندنی باڵا و توێژینەوەی زانستی لە ڕێگای ئاڤا میدیاوە داوا لەو بەشداربووانەی کۆرسی زمانی ئینگلیزی دەکات، کە ڕەخنەیان هەبوو لە شێوازی وەرگرتنی پارەی بەشداری، ڕۆژی یەکشەممە سەردانی وەزارەت بکەن.

 

چیرۆکی سەرەکی: ئەمڕۆ پێنجشەممە، چەند بەشداربوویەکی کۆرسی زمانی ئینگلیزی لە سەنتەری زمانی زانکۆی سەڵاحەددین وێنەی دوو وەسڵیان بۆ ئاڤا میدیا ناردووە. یەکێک لە بەشداربووان دەڵێت: 50 هەزار دینارم داوە، بەڵام لەسەر وەسڵەکە نووسراوە 30 هەزار دینار. یەکێکی دیکەیان دەڵێت: 150 هەزار دینارم داوە کەچی لەسەر وەسڵەکە نوسراوە 90 هەزار دینار.

 

لێدوانی فەرمی: لە گەشتی هەواڵەکانی کاتژمێر 7:00ـی ئاڤا کە هەوراز گوڵپی پێشکەشی دەکات. د.ئارام محەممەد قادر، وەزیری خوێندنی باڵا و توێژینەوەی زانستی پەیامێکی بۆ ئاڤا نارد و وتی، سوپاسی ئاڤا دەکەم کە بەدواداچوونی کردووە بۆ ئەم بابەتە و داوا لەو بەشداربووانە دەکەم یەکشەممە لە وەزارەت سەردانم بکەن بۆ ئەوەی بەدواداچوون بۆ کێشەکانیان بکەم.

لەلایەکی دیکەوە: د.توانا نەجەف، بەڕێوەبەری گشتی کارگێڕی و دارایی لە وەزارەتی خوێندنی باڵا و توێژینەوەی زانستی دەڵێت: بابەتەکە ڕاستە، بەڵام ئەمە فێڵ نییە، بۆ ئەوەی سەنتەری زمان دووربێت لە فێڵکردن و واستە و واستەکاری، کارەکانی دراوە بە کۆمپانیایەکی بەریتانی و ئەوان سەرپەرشتی دەکەن، بەپێی ڕێککەوتنەکە ئەو پارەیەی لە بەشداربوو وەردەگیرێت بەشێکی بۆ حکومەت و بەشێکی بۆ کۆمپانیا بەریتانیەکەیە. بەڵام تەواوی پارەکە لەسەر وەسڵەکە نانوسرێت. ئەگەر هەموو پارەکە لەسەر وەسڵەکە بنوسرێت دەبێت تەواوی پارەکە بۆ حکومەت بنێردرێت.