لایەنگرانی سەدر گەمارۆی بنکەیەکی پۆلیس دەدەن و چەند دەستگیرکراوێک  ئازاد دەکەن

ئاڤا نیوز

دوای گەمارۆدانی بنکەیەکی پۆلیس لە شاری نەجەف، لایەنگرانی موقتەدا سەدر چوار دەستگیرکراوی ڕەوتەکەیان بە زۆر ئازاد دەکەن.

 

چیرۆکی سەرەکی: بەپێی سەرچاوەیەکی ئەمنی شاری نەجەف،  دوای ئەوەی هێزێکی ئەمنی ڕێگرییان لە چوار ئەندامی سەرایا سەلام (باڵی سەربازیی ڕەوتی نیشتمانی شیعە) دەکەن و ناهێڵن ئاڵا و لۆگۆی ڕەوتەکەیان لەسەر بەرزە پردی زەهرا لە ناوەڕاستی شاری نەجەف بەرزبکەنەوە، دەمەقاڵە و پشێوی لەنێوان هەردوولا ڕوودەدات.

 

زانیاریی زیاتر: لەئاکامدا پۆلیس ئەو چوار کەسە دەستگیر دەکات دەیانگوازنەوە بۆ بنکەی پۆلیسی میسان.

 

چی ڕوویدا: هەر بەپێی ئەو سەرچاوەیە، زیاتر لە 200 ئەندام و لایەنگری موقتەدا سەدر کۆبوونەوە و گەمارۆی بنکەی پۆلیسی میسانیان لە ناوەڕاستی شاری نەجەف دا و پاسەوان و کامەندانی بنکەکەش نەیانتوانی دۆخەکە کۆنتڕۆڵ بکەن و بەناچاری دەستگیرکراوەکانیان ئازاد کرد.