عێراق داوا لە ئەمریكا دەكات لە زۆنی ترسناكی گەشتكردن دەریبهێنێت

ئاڤا نیوز

وەزیری دەرەوەی عێراق داوای لە هاوتا ئەمریكییەكەی كردووە، عێراق لە زۆنی هۆشداریی ئەمنیی گەشتكردن دەربهێنێت، بەو پێیەی كاریگەری نەرێنی لەسەر هاتنی كۆمپانیا ئەمریكییەكان دەبێت.

 

وێنە گەورەكە: لەمیانی گەشتەكەی بۆ واشنتن، د. فوئاد حوسێن، جێگری سەرۆكوەزیرانی عێراق و وەزیری دەرەوە لەگەڵ ماركۆ ڕوبیو، وەزیری دەرەوەی ئەمریكا كۆبووەوە، بەگوێرەی ڕاگەیێنراوی فەرمیی وەزارەتی دەرەوەی عێراق، لەو كۆبوونەوەیەدا باس لە ڕێگاكانی چالاككردنی هاوكارییەكان كراوە لەبوارە سیاسی، ئەمنی و ئابوورییەكاندا.

 

ئەوەی پێویستە بیزانیت: ئەمریكا پێشتر چەند جارێك عێراقی لە زۆنی ترسناكی ئەمنی هەژماركردووە و ئامۆژگاری هاووڵاتیانی كردووە كە بەهیچ جۆرێك گەشتی ئەو وڵاتە نەكەن.

 

لێدوانی فەرمی: د. فوئاد حوسێن داوای لە ماركۆ ڕۆبیو كردووە، عێراق لە زۆنی مەترسیداری گەشتكردن دەربهێنێت، بەو پێیەی دۆخی ئەمنی لە عێراق باش بووە و هەلی گونجاو هاتۆتە پێش بۆ ڕاكێشانی وەبەرهێنانی بیانی، چەندین وڵاتی ئەوروپیش چاویان بە هەڵسەنگاندنی دۆخی ئەمنیی عێراق خشاندووەتەوە و بۆچوونیان گۆڕاوە.