داواکاریی گشتی ئێران: لێپرسینەوە لە ئەنجامدەرانی تەقینەوەکەی بەندەر عەباس دەکەین

ئاڤا نیوز

تەقینەوەکەی کۆگایەکی ماددە کیمیاییەکان لە بەندەری شەهید ڕەجائی لە باشووری ئێران مردنی لانیکەم پێنج کەس و برینداربوونی 516 کەسی لێکەوتەوە، داواکاریی گشتی ئێرانیش لێکۆڵینەوەی لە تەقینەوەکە دەستپێکرد.

چیرۆکی سەرەکی: ئەمڕۆ شەممە لە پارێزگای هورمزکان لە باشوری ئێران تەقینەوەیەک لە بەندەری شەهید ڕەجائی لە شارۆچکەی بەندەر عەباس ڕوویدا، بەوتەی بەرپرسانی ناوخۆی ئێران هۆکاری ڕووداوەکە تەقینەوەیەک بووە لە بەشی کۆگای بەندەرەکە، لە ئەنجامیشدا جگە لە مردنی پێنج کەس و برینداربوونی لانیکەم 516 کەس، چارەنوسی ژمارەیەک کەسی دیکەش نادیارە کە کەوتوونەتە ژێر داروپەردووی باڵەخانە ڕووخاوەکانی نزیک لە تەقینەوەکە.

لێدوانی فەرمی: محەممەد موحەدی، سەرۆکی داواکاری گشتیی ئێران ڕایگەیاند، فەرمانی کردووە لێکۆڵینەوەی دەستبەجێ و ورد لە ڕووداوەکە بکرێت، لێکۆڵینەوەکە بەدواداچوون بۆ ئەوانەش دەکات کە لە ڕووداوەکە تێوەگلاون یان کەمتەرخەم بوون.

باکگراوند: ساڵی 2020یش کۆمپیوتەرەکانی هەمان بەندەر ڕووبەڕووی هێرشێکی ئەلیکترۆنی بوونەوە و لە ئەنجامدا بێسەروبەری لە ئاڕاستەی جووڵەی کەشتییەکان و کاری بەندەرەکە دروستبوو، ئەو کات ڕۆژنامەی واشنتن پۆست ئاشکرای کردبوو کە ئیسرائیل لە پشت هێرشە ئەلیکترۆنییەکانەوە بووە.

به‌ته‌نیشت ئه‌م بابه‌ته‌وه‌: لە یەکەم کاردانەوەی تەقینەوەکەی ئەمڕۆشدا ڕۆژنامەی مەعاریفی ئیسرائیلی لە بەرپرسانی سەربازیی وڵاتەکەیەوە بڵاویکردەوە، سوپای وڵاتەکەیان هیچ پەیوەندییەکی بە تەقینەوەی بەندەر عەباسی ئێرانەوە نییە.