ڕووسیا بۆ یەکەمجار دانی نا بە بەشداریی سەربازانی کۆریای باکوور لە جەنگی ئۆکراینا

ئاڤا نیوز

 

ڕووسیا بۆ یەکەم جار دان بە بەشداریی سەربازانی کۆریای باکوور لە جەنگی دژ بە ئۆکراینا دەنێت و دەڵێت، شانبەشانی سوپای وڵاتەکە لەو ناوچەیە شەڕیان کردووە.

 

وێنە گەورەکە: سێ  ساڵە شەڕی نێوان ڕووسیا و ئۆکراینا بەردەوامە. نزیکەی ساڵێکیشە ڤۆلۆدیمێر زێلێنسکی، سەرۆکی ئۆکراینا و بەرپرسانی ڕۆژئاوا، مۆسکۆیان بەوە تۆمەتبار دەکرد لە جەنگی دژ بە کیێڤ سوودی لە سەربازی کۆریای باکوور وەرگرتووە و لەیەک سەنگەر دژی کیێڤ شەڕیان کردووە.

 

لێدوانی فەرمی: سەرۆکی ئەرکانی گشتیی ڕووسیا، ڤالێری گێراسیمۆڤ، لە پەیوەندییەکی ڤیدیۆیکدا لەگەڵ ڤلادیمێر پووتین سەرۆکی ڕووسیا ڕایگەیاند، سەربازانی کۆریای باکوور بەشدارییەکی بەرچاویان لە ڕزگارکردنی ناوچەی کورسک هەبووە و شان بەشانی هێزەکانی شەڕیان ڕووسیا کردووە. هاوکات گێراسیمۆڤ جەختی لەوەکردەوە، ئەرکی شەڕکردن بەپێی ڕێککەوتنی هاوبەشی ستراتیژی نێوان هەردوو وڵات ئەنجامدراوە.

 

ئەوەی لەبارەیەوە دەگوترێت: سەبارەت بەو پرسە، کۆریای باشوور چەندین جار ڕاپۆرتی لەسەر هەبوونی سەربازی کۆریای باکوور بڵاوکردووەتەوە. بەگوێرەی ڕاپۆرتەکە نزیکەی 11 هەزار سەربازی کۆریای باکوور لە ناوچەی کورسک هاوشانی سەربازانی ڕووسیا  دژ بە ئۆکراینا شەڕیان کردووە.