بەهۆی ساغنەبوونەوە جووتیارێک بەرهەمەکەی دەداتە مەڕ و ماڵات

ئاڤا  نیوز

بەهۆی بەرهەمی قاچاغەوە کە لە دەروازە سنوورییەکانی سنووری پارێزگای سلێمانی داخلی هەرێمی کوردستان دەکرێت، جووتیارێک لە سەیدسادق لە بری فرۆشتنی بەرهەمی ئەمساڵی، مەڕ و ماڵاتی بەرداوەتە کێلگەکەی کە بە کاهوو داچێنراوە.

چیرۆکی سەرەکی: لە گوندی مایاوای سەر بە ناحیەی بەرزنجە لە قەزای سەید سادق، جووتیارێک دوای بێهیوابوونی لە قازانجی فرۆشتنی بەرهەمەکانی، مەڕ و ماڵاتی بەرداوەتە نێو دوو دۆنم زەوی داچێنراو بە کاهوو.

لێدوانی فەرمی: حاجی دیار، بە ئاڤای گوت، "ئەو ڕۆژە 800 کیلۆم بردووەتە عەلوەی سلێمانی، بەحاڵ توانیم بە 55 هەزار دینار بیفرۆشم، خۆ ئەوە بەشی بەنزین و کرێی کرێکارەکانیش ناکات."

بۆچوونی لایەنی بەرامبەر: بەڕێوەبەرایەتی کشتووکاڵی سلێمانی بە ئاڤای وت، ئێمە بەردەوام نووسراو بۆ دەروازە سنوورییەکان دەکەین دەڵێین مە‌هێڵن ئەو بەرهەمانە داخل ببن، کەچی لەلایەکی دیکەوە بە قاچاغ هاوردە دەکرێت. جگە لەوەش بەردەوام لیژنەکان لە عەلوەکان سزای ئەو بازرگانانە دەدەن کە بەرهەمی دەرەوە دەفرۆشن، بەڵام بەوەش نەتوانراوە بنبڕ بکرێت.

ئەوەی پێویستە بیزانیت: وەزارەتی کشتوکاڵ ڕێنمایی دەرکردووە کە لەکاتی پێگەیشتنی بەرهەمی ناوخۆ، هاوردەکردنی لە دەرەوە قەدەغەیە."