وەزیرانی دەرەوەی ڕووسیا و ئەمریکا پەیوەندییەکی تەلەفۆنی ئەنجام دەدەن

ئاڤا نیوز

 

سێرگی لاڤرۆڤ و مارکۆ ڕۆبیۆ لە پێناو ئامادەسازییەکان بۆ کۆبوونەوەیەکی دیکەی نێوان ئەمریکا و ڕووسیا پەیوەندییەکی تەلەفۆنیان ئەنجامدا.

 

وێنە گەورەکە: کۆبوونەوە و دانوستانی نێوان ئەمریکا و ڕووسیا لەسەر پرسی کۆتایهێنان بە جەنگی نێوان ڕووسیا و ئۆکراینا دوای هەوڵێکی زۆر ئەنجامدرا و وێستگەی یەکەمی کۆبوونەوەکانیش لە سعودییە بوو، ئێستا هەردوولا لە هەوڵی ئاسایکردنەوەی پەیوەندییەکاندا.

 

بڵاوکراوەی فەرمی: ماڵپەڕی فەرمی وەزارەتی دەرەوەی ڕووسیا بڵاویکردووەتەوە، پەیوەندییەکی تەلەفۆنی لە نێوان هەریەک لە سێرگی لاڤرۆڤ، وەزیری دەرەوەی ڕووسیا و مارکۆ ڕۆبیۆ، وەزیری دەرەوەی ئەمریکا ئەنجامدراوە، لە پەیوەندییە تەلەفۆنییەکەدا پرسی جەنگ لەگەڵ ئۆکراینا و ئامادەسازییەکان بۆ بەردەوامی و خێراکردنی کۆبوونەوە و دانوستاندنەکان تاوتوێ کراوە.

 

- ئەنجامەکانی کۆبوونەوەی نێوان ڤلادیمێر پووتین، سەرۆکی ڕووسیا و ستیڤ ویتکۆڤ، نێردەی تایبەتی سەرۆکی ئەمریکا بەشێکی دیکەی گفتووگۆکانی وەزیرانی دەرەوەی هەردوو وڵات بووە و کارکردنی هاوبەش لە پێناو لابردنی بەربەستەکانی بەردەم بەهێزکردنی پەیوەندییەکانی ئەمریکا و ڕووسیا ئامانجی سەرەکی و هاوبەشی هەردوو دەوڵەت دەبێت.

 

ئەوەی پێویستە بیزانیت: دواین کۆبوونەوەی فەرمی نێوان ڕووسیا و ئەمریکا لە ڕۆژی هەینی  25 – 4 – 2025 بوو لە نێوان نێوان ڤلادیمێر پووتین، سەرۆکی ڕووسیا و ستیڤ ویتکۆڤ، نێردەی تایبەتی سەرۆکی ئەمریکا لە مۆسکۆ بەڕێوەچوو.

 

بۆچی گرنگە: بەردەوامی و بەهێزکردنی پەیوەندییەکانی واشنتن و مۆسکۆ کاریگەریی گەورەی لەسەر ئاشتی جیهانی و خێراکردنی پرۆسەی ڕاگرتنی جەنگ لە نێوان ڕووسیا و ئۆکراینا دەبێت، بە نزیکبوونەوەی ئەمریکا و ڕووسیا، ئەنجامدانی ڕێککەوتنی ئاشتی لە نێوان ئۆکراینا و ڕووسیا ئەگەرێکی بەهێزتر دەبێت.