شەرع: تاوەکو ئیسرائیل لە سووریا نەکشێتەوە دانوستانی ئاشتی ناکەین

ئاڤا نیوز

 

سەرۆککۆماری سووریا بۆ قۆناغی ڕاگوزەر دوپاتیکردەوە، پێش کشانەوەی ئیسرائیل هیچ قسەیەک لەسەر ئاشتی لەگەڵ ئیسرائیل ناکرێت.

 

چیرۆکی سەرەکی: لە سەردانەکەی کوری میڵز، سیناتۆری ئەمریکی بۆ سووریا لە هەفتەی ڕابردوو، داوای لە ئەحمەد شەرع، سەرۆکی سووریا بۆ قۆناغی ڕاگوزەر کردووە کە هەوڵی ئاشتی لەگەڵ ئیسرائیل بدەن و پەیوەندییەکانیان ئاسایی بکەنەوە، بەڵام شەرع چەند مەرجێکی هەبووە.

 

لێدوانی فەرمی: ئەحمەد شەرع، سەرۆککۆماری سووریا بۆ قۆناغی ڕاگوزەر بە سیناتۆری ئەمریکی کە بەم دوایانە سەردانی دیمەشقی کردبوو ڕایگەیاندووە، ''ئێمە بە هیچ شێوەیەک دانوستان و هەوڵی ئاشتی لەگەڵ ئیسرائیل نادەین تا ئەو کاتەی بە تەواوی لە خاکی سووریا دەکشێتەوە''.

 

زانیاریی زیاتر: شەرع داوای لە ئەمریکا کردووە کە فشارەکانی بۆ سەر ئیسرائیل زۆرتر بکاتەوە بۆ کۆتایی هێنان بە بۆردومانەکانی ئیسرائیل بۆ سەر سووریا کە بووەتە هۆی تێکدانی ئارامی و سەقامگیری ناوچەکە.

 

ئەوەی پیویستە بیزانیت: هەفتەی ڕابردوو کوری میڵز، سیناتۆری ئەمریکی سەردانی دیمەشقی کرد و لەگەڵ ئەحمەد شەرع کۆبووە و تێیدا باسی هەڵگرتنی سزا نێودەوڵەتییەکانی سەر سووریا و ئاشتی لەگەڵ ئیسرائیل و گەیاندنی هاوکاری بۆ بووژاندنەوەی ئەو وڵاتە کرا.

 

باکگراوند: لە دوای ڕووخانی دەسەڵاتی بەشار ئەسەد، سەرۆکی پێشووی سووریا لە ساڵی ڕابردوو، ئیسرائیل ئەمەی بە دەرفەت زانی تەواوی چیای حەرمون و ناوچەی پارێزراوی لە سووریا داگیر کرد.