فوئاد حوسێن: دانوستانەکانی ئەمریکا و ئێران شکست بێنێت کارەسات دروست دەبێت

ئاڤا نیوز

 

وەزیری دەرەوەی عێراق لە واشنتن ئاماژەی بەوە کردووە، لە حاڵەتی شکستهێنانی دانوستانی نێوان ئەمریکا و ئێران، "کارەسات" لەناوچەکەدا دورست دەبێت، عێراق توانیویەتی لەو شەڕەی لەناوچەکەدا هەن خۆی بەدوور بگرێت. 

 

وێنە گەورەکە: دوای ساڵانێک ناکۆکی و هەڕەشەکردن لە یەکتری، مانگی نیوان ئەمریکا و ئێران بە نێوەندگیری عوممان سێ خولی دانوستانیان ئەنجامدا و هەردوولا نزیکن لە گەڕی چوارەمی گفتوگۆکانیان. 

ڕاگەیێنراوی فەرمی: فوئاد حوسێن، جێگری سەرۆکوەزیران هاوکات وەزیری دەرەوەی عێراق ڕایگەیاند:
 

- عێراق پشتیوانی لە پرۆسەی دانوستانی نێوان واشنتن و تاران دەکات، هاوکات هیواخوازە هەردوولا بگەنە لێکتێگەیشتن.

- شکستی بژاردەی دیپلۆماسی لێکەوتەی کارەساتبار بۆ ناوچەکە بەدوای خۆیدا دەهێنێت.

 -عێراق بەهۆی سزاکانی ئەمریکا بۆ سەر ئێران بەدوای سەرچاوەی جێگرەوەی غازی ئێرانی دەگەڕێت کە نزیکەی  33 %ی کارەبای عێراق دابین دەکات.

-     دانوستانەکان لەگەڵ چەند وڵاتێک لە ئارادایە، لەوانە تورکیا، ئوردن و وڵاتانی کەنداو، بۆ دەستەبەرکردنی پێداویستییەکانی کارەبا.

-    عێراق هەوڵ دەدات خۆی لە گرژییەکانی ناوچەکە دوور بخاتەوە، بەشێک نییە لەو کێشانە بەڵکو هەوڵدەدات بەشێک بێت لە چارەسەر.

-     سەرکەوتوو بووین لە دوورخستنەوەی وڵاتەکەمان لە بڵێسەی شەڕەکانی ناوچەکە و کار بۆ بەردەوامبوون لەسەر ئەم سیاسەتە هاوسەنگە دەکەین.

ئەوەی پێویستە بیزانیت: ڕۆژی پێنجشەممە 24ی نیسان، فوئاد حوسێن, بە سەردانێکی فەرمی گەیشتە واشنتن و چەندین دیداری دوو قۆڵی لەگەڵ بەرپرسانی باڵای حکومەتی ئەو وڵاتە ئەنجامدا.