نەتەنیاهۆ: بۆ پاراستنی دروزەکان هێزێکی چەکدارمان لە سووریا کردە ئامانج

ئاڤا نیوز

 

ئیسرائیل "بۆ پاراستنی دروزەکانی سووریا" هێرشێکی ئاسمانی کردە سەر گرووپێکی چەکداری لە سنووری پارێزگای دیمەشق لە سووریا.

 

وێنە گەورەکە: بڵاوبوونەوەی ڤیدیۆیەک کە چەند کەسێک لە دروزەکان بێڕێزی بە پێغەمبەری ئیسلام (د.خ)  دەکەن، بووەتە هۆی توڕەبوونی گرووپە چەکدارییە سونییەکانی سووریا و ماوەی دوو ڕۆژە بە بەردەوامی ڕووبەڕووبوونەوە و پێکدادانی چەکداری لە نێوان کۆمەڵێک گرووپی چەکداری و دروزەکان ڕوودەدات تاوەکو ئێستاش بەردەوامە.

 

لێدوانی فەرمی: بنیامین نەتەنیاهۆ، سەرۆکوەزیرانی ئیسرائیل ئەمڕۆ لە وتارێکدا لە مەراسیمی یادکردنەوەی سەربازە کوژراوەکانی ئیسرائیل ڕایگەیاند: ”هێرشی گرووپە سونییە چەکدارەکانمان ڕاگرت کاتێک ویستوویانە هێرش بکەنە سەر کۆمەڵگەی نیشتەجێبوونی دروزەکان لە پارێزگای دیمەشق، بە هێرشێکی ئاسمانی ژمارەیەکی زۆر لە گرووپە چەکدارەکان کوژراون و پابەندیین بە پاراستنی دروزەکان و دەبێت حکومەتی سوریا دڵنیایی بدات لەوەی کە گیانی دروزەکان پارێزراو دەبێت."

 

لەلایەکی دیکەوە: ئیسرائیل کاتز، وەزیری بەرگریی ئیسرائیل ڕایگەیاند: "بە بڕیاری بنیامین ناتانیاهۆ، سەرۆکوەزیارانی ئیسرائیل هێرشیکی ئاسمانی کراوەتە سەر گرووپە چەکدارەکانی نزیک لە ناوچەی نیشتەجێبوونی دروزەکان لە کاتێکدا ویستوویانە هێرش بکەنە سەر دروزەکان، ئێمە براکانمان لە سووریا دەپارێزین و پەیوەندییەکی مێژووی پێکەوە دەمانبەستێتەوە."

 

ئەوەی پێویستە بیزانیت: دروزەکان وەک یەکێک لە پێکهاتە سەرەکیەکانی سووریا بەوە ناسراونەتەوە کە پێکهاتەیەکی نزیکن لە ئیسرائیل، گەورەترین کۆمەڵگەی نیشتەجێبوونی دروزەکان لە پارێزگای دیمەشقی پایتەختی سووریایە و ئیسرائیل هەمیشە پابەندیی خۆی بە پاراستنی دروزەکان دووپاتکردۆتەوە و جەخت لە بەهێزکردن و بەشداریکردنیان لە پرسە سیاسییە گرنگەکاندا دەکات.