هەرێمی کوردستان تاوتوێی قەدەغەکردنی هێنانی کرێکاری بیانی دەکات

ئاڤا نیوز

 

بەپێی بڕیارێکی نوێی وەزارەتی کاری عێراق، لەمەودوا ڕێگە نادرێت کرێکارانی پێنج وڵاتی جیهان لە عێراق کار بکەن، لە هەرێمی کوردستانیش تاوتوێی بڕیارەکە دەکرێت و لیژنەی بۆ پێکهێنراوە.

 

وێنە گەورەکە: زیاتر لە دوو ملیۆن کرێکاری بیانی لە عێراق کاردەکەن و بەشێکی کەمیان بە فەرمی تۆمارکراون و مۆڵەتی کارکردنیان هەیە، ئێستا بەپێی بڕیاری وەزارەتی کاری عێراق، لەمەودوا ڕێگری لە هاتنەناوەوەی كرێكارانی پێنج وڵاتی جیهان بۆ ناوخۆی عێراق دەکرێت کە پێکدێن لە وڵاتەکانی، سووریا، ئێندۆنیزیا، پاكستان، بەنگلادیش و فلیپین.

 

لێدوانی فەرمی: د. ناجی عەلی، بەڕێوەبەری بەكارخستن لە وەزارەتی كار و كاروباری كۆمەڵایەتی بە ئاڤای گوت، "لیژنەیەکی باڵامان هەیە بۆ لێکۆڵینەوە لەسەر قەدەغەکردنی هاتنی کرێکاری بیانی بۆ هەرێمی کوردستان، لەسەر جێبەجێکردنی ئەو بڕیارەی عێراقیش لە هەرێمی کوردستان، لە کۆبوونەوەی ئەو لیژنەیەدا یەکلایی دەکەینەوە کە ئێمە چۆن مامەڵە لەگەڵ بڕیارەکەدا دەکەین."

 

لەلایەکی دیکەوە: بە بڕیاری ژمارە 172ـی ئەنجوومەنی وەزیرانی هەرێمی کوردستان، هەر کۆمپانیایەکی ناوخۆیی، یان بیانی لە هەرێمی  کوردستان کار بکات و بیەوێت کرێکاری بیانی بهێنێت، دەبێت 75٪ـی کرێکارەکانی خەڵکی ناوخۆی هەرێمی کوردستان بن و بۆی هەیە تەنیا 25٪ـی کرێکارەکانی بیانی بن.