دادگای فیدڕاڵی بڕیاردان لەسەر سکاڵاکەی لەتیف ڕەشید و سوودانی دوادەخات

ئاڤا نیوز

 

دادگای فیدڕاڵی بڕیاردانی لەبارەی سکاڵاکەی سەرۆککۆمار و سەرۆکوەزیرانی عێراق بۆ پێداچوونەوە بە هەڵوەشاندنەوەی ڕێککەوتنی خۆر عەبدوڵڵای ئاوی لە نێوان کوەیت و عێراق بۆ 22ـی حوزەیران دواخست.

 

وێنە گەورەکە: ساڵی 2023 دادگای فیدڕاڵی ڕێککەوتنی دەریایی خۆر عەبدوڵڵای لەنێوان کوەیت و عێراق بە نادەستووری لەقەڵەمدا، بەهۆکاری ئەوەی لە پەرلەمان دەنگی دوو لەسەر سێی پەرلەمانتارانی بەدەستنەهێناوە کە مەرجێکی دەستوورییە بۆ پەسەندکردنی ڕێککەوتنە نێودەوڵەتییەکان، ئەم بڕیارەی دادگاش کێشەی بۆ پەیوەندییە دەرەکییەکانی عێراق دروستکردووە.

 

ڕاگەیێنراوی فەرمی: بڕیاربوو ئەمڕۆ چوارشەممە دادگای فیدراڵی دوو سکاڵای هەریەکە لە لەتیف ڕەشید سەرۆککۆمار و محەممەد شیاع سوودانی، سەرۆکوەزیران تاوتوێ بکات کە تیایدا داوایانکردبوو دادگاکە پێداچوونەوە بە بڕیارێکی خۆیدا بکات بۆ هەڵوەشاندنەوەی ڕێککەوتنی ئاویی نێوان عێراق و کوەیت کە ڕۆژی 4ی ئەیلوولی 2023 دەریکردووە.

 

دادگای فیدڕاڵی بڕیاردانی لەسەر ئەم بابەتە بۆ ڕۆژی 22ـی مانگی حوزەیران دواخست، ئەوەش مانای وایە بڕیاردانی دادگا لەسەر ئەم بابەتە دەکەوێتە دوای لوتکەی عەرەبی لە 17ـی ئایاری ئەمساڵ، بەوەش هەم گریمانەی ئامادەبوونی سەرکردەکانی عەرەب زیاتر دەبێت و پشتیوانانی هەڵوەشاندنەوەی ڕێککەوتنەکەش بۆ کۆکردنەوەی بەڵگە، کاتی زیاتریان لەبەردەست دەبێت.