وەزیری بەرگریی ئەمریکا بۆ ئێران: باجی پشتیوانیکردن لە حووسییەکان دەدەن

ئاڤا نیوز

 

لە کاتێکدا هێرشەکانی ئەمریکا بۆ سەر پێگە و  بارەگاکانی حووسییەکان بەردەوامە، ئەمریکا هەڕەشە لە ئێران دەکات لە پاڵپشتیکردنی ئەو گرووپە.

 

وێنە گەورەکە: ئەمریکا بەردەوامە لە ئۆپەراسیۆنە سەربازییەکانی بۆ سەر گرووپی حووسییەکان و هەمیشە ئێران تۆمەتبار دەکات بەوەی پاڵپشتی و پشتیوانی سەربازی بۆ ئەو چەکدارانە دابین دەکات، هەر لەبەر ئەوە هۆشداری بە ئێران دەدات.

 

لێدوانی فەرمی: پیت هێگسەس، وەزیری بەرگریی ئەمریکا پەیامێکی توندی ئاراستەی ئێران کرد و ڕایگەیاند: ''ئێمە بەردەوام پاڵپشتی ئێوە بۆ حووسییەکانی یەمەن دەبینین و دەزانین کە چییان بۆ دەکەن، لە هەمانکاتدا دەزانن کە تواناکانی سوپای ئەمریکا چین، دڵنیابن باجەکەی دەدەن''.

 

لەلایەکی دیکەوە: بەرپرسێکی باڵای ئێران لە سەرەتای مانگی نیسانی ئەمساڵدا ڕایگەیاندبوو، تاران بڕیاری کشانەوەی هێزە سەربازییەکانی لە یەمەن و وەستاندنی پشتیوانییەکانی بۆ حووسییەکان داوە. ئەمەش هاوکات بوو لەگەڵ چڕکردنەوەی هێرشە ئاسمانییەکانی ئەمریکا بۆ سەر حووسییەکان.