وەزیری دوورخراوەی تەندروستیی لیبیا ڕوونکردنەوە لەبارەی کڕینی دەرمانی عێراقی دەدات

ئاڤا نیوز

 

دوای ئەوەی بەهۆی هاوردەکردنی دەرمانی عێراقییەوە لە پۆستەکەی دوورخرایەوە، وەزیری تەندروستی لیبیا ڕایگەیاند، وەزارەتەکەی هاوردەکردنی دەرمانی عێراقیی بە یاسای کڕیووە و لەسەر داواکاریی ڕاستەوخۆی نەخۆشخانەکانی تایبەت بە شێرپەنجە بووە.

 

وێنە گەورەکە: بەهۆی ئەوەی دەرمانی عێراقی تایبەت بە چارەسەری شێرپەنجەی هاوردە کردووە، ڕۆژی سێشەممەی ڕابردوو سەرۆکوەزیرانی لیبیا، وەزیری تەندروستیی وڵاتەکەی و ژمارەیەک بەرپرسی دیکەی لە پۆستەکانیان دوورخستەوە.

 

لێدوانی فەرمی: ڕەمەزان ئەبوجناح، وەزیری دوورخراوەی تەندروستیی لیبیا لە لێدوانێکدا ئاماژەی بەوەکرد، ئەو کۆمپانیایەی گرێبەستی کڕینی دەرمانی لەگەڵدا کراوە لە بەشی دەرمانەکان تۆمارکراوە و فەرمی بووە، هێنانی دەرمانەکەش لەسەر داواکاریی ڕاستەوخۆی نەخۆشخانەکانی تایبەت بە شێرپەنجە بووە، گرێبەستەکەش هەموو ڕێکارە کارگێڕیی و یاساییەکانی بڕیووە.

 

- سەبارەت بە گەیشتنی بارهەڵگری دەرمانەکانیش، ڕەمەزان ئەبوجناح ئاشکرای کرد کە تائێستا دەرمانەکان نەگەیشتوونەتە خاکی لیبیا و پارەی کۆمپانیای هەناردەکاری دەرمانەکەش نەدراوە، هەموو دەرمانێکیش کە دەگاتە وڵات لەلایەن دەستەی چاودێریی خۆراک و دەرمان پشکنینی بۆ دەکرێت بەر لەوەی دابەش بکرێت.

 

زانیاریی زیاتر: وەزیری دوورخراوەی تەندروستیی لیبیا داواش دەکات "دۆسییەکە ڕەوانەی داواکاری گشتیی وڵاتەکەی بکرێت تا بەشێوەیەکی شەفاف لێکۆڵینەوە بکات و کۆتایی بەم مشتوومڕە بهێنرێت، بەجۆرێک مافی نەخۆشانی لیبیش گەرەنتی بکرێت".