ئەردۆغان؛ یەکپارچەیی خاکی سووریا بۆ ئێمە پرسێکی گرنگە

ئاڤا نیوز

 

سەرۆککۆماری تورکیا هۆشداری بەو دەوڵەت و لایەنانە دەدات کە هەوڵی "تێکدانی سەقامگیری و ئاسایشی سووریا" دەدەن.

 

وێنە گەورەکە: حکومەتی نوێی سووریا لە قۆناغیکی پڕ ئاڵنگاریدایە و چەند ڕۆژی ڕابردوو گەورەترین بەربەستەکانی بەردەم سووریای نوێ دەرکەوتن، ڕووبەڕووبونەوە و پێکدادانی چەکداری لە نێوان گرووپە چەکدارییەکان و دروزەکانی دیمەشق، هێرشی ئاسمانی ئیسرائیل بۆ سەر گرووپە چەکدارەکان و هەواڵی کۆبوونەوەی هێزە سەربازیەکانی سەر بە بەشار ئەسەد لە ژێر سەرپەرشتی ئێران و مەترسی دووبارە هێرشکردنەوە سەر هێزەکانی حکومەتی نوێی سووریا بووەتە جێی ترس و نیگەرانی بۆ تورکیا.

 

لێدوانی فەرمی: ڕەجەب تەیب ئەرۆغان، سەرۆککۆماری تورکیا لە کۆبوونەوەی لەگەڵ میدیاکاراندا سەبارەت بە پرسی سووریا ڕایگەیاند: " یەکپارچەیی خاکی سووریا بۆ ئێمە پرسێکی گرنگە و بە هیچ شێوەیەک دەستبەرداری نابین، حکوومەتی سووریاش بە هەمان هەستیارییەوە مامەڵە لەگەڵ ئەو پرسەدا دەکات و ئەو هێز و لایەنانەی پلانی دەوڵەتی فیدراڵی و دابەشکردنی خاکی سووریایان هەیە دەبێت ئەوە بزانن تورکیا هیچ کات ڕێگە بە خەیاڵی لەو شێوەیە نادات و بە هەموو هێز و توانامانەوە ڕووبەڕوویان دەبینەوە."

 

زانیاریی زیاتر: ڕەجەب تەیب ئەرۆغان، سەرۆککۆماری تورکیا سەبارەت بە "پیلانگێڕییە هەرێمیەکان و دەوڵەتان دژ بە سووریا" گوتی: " ئیسرائیل بە هێرش و دەستێوەردانەکانی دەیەوێت دۆخی ئەرێنی سووریا تێکبدات و لەگەڵ هەندێک گرووپی نێو سووریا مەترسی بۆ سەر ئاسایشی وڵاتەکە دروست بکەن، بەڵام دەبێت هەموان بزانن تورکیا وەک هەمیشە پشتیوانی سووریا و حکومەتەکەی دەبێت."