دابەزینی بەهای نەوت زیانی زیاتر لە حەوت ملیار دۆلار بە عێراق دەگەیێنێت

ئاڤا نیوز

 

شارەزایەکی ئابووریی دەڵێت، بەهۆی دابەزینی بەهای نەوت و فرۆشتنی دۆلار بە بڕێکی زۆر لەلایەن بانکی ناوەندییەوە، لە چارەگی یەکەمی ئەمساڵدا عێراق زیانی حەوت ملیار و 440 ملیۆن دۆلاری پێگەیشتووە.

 

وێنە گەورەکە: بانکی ناوەندی عێراق بۆ ئەوەی نرخی دۆلار دابەزێنێت و دیناری زیاتری بێتە دەست، لە سێ مانگی ڕابردوودا بڕێکی زۆر دۆلاری خستووەتە بازارەوە، ئەوەش وایکردووە بەهای 100 دۆلار لە 150 هەزار دینارەوە بۆ خوار 145 هەزار دینار دابەزێت.

 

لێدوانی فەرمی: نەبیل مەرسوومی، مامۆستای زانکۆ و شارەزای ئابووری ڕایگەیاند، بەگوێرەی داتاکانی بانکی ناوەندی و بەهۆی دابەزینی بەهای نەوت، لە سێ مانگی سەرەتای ئەمساڵدا یەدەگی بانکی ناوەندی لە 105 ملیار و 290 ملیۆن دۆلارەوە بۆ 97 مليار و 844 ملیۆن دۆلار کەمیکردووە.

 

هۆکارە زانراوەکان: بانکی ناوەندی لە دراوی یەدەگی بانکی، دراوی بیانیی بەڕێژەیەکی زیاتر لە کڕیارەکانی لە وەزارەتی دارایی عێراق فرۆشتووە، ئەوەش لایەنێکی باشە چونکە نرخی دۆلاری دابەزاندووە و لایەنێکی خراپیشی هەیە کە یەدەگی بانکی ڕووی لە کەمبوونەوە کردووە.