ساڵی ڕابردوو هەزار و 400 کرێکاری ناوخۆیی لە شوێنی کرێکاری بیانی دانراون

ئاڤا نیوز

 

ئاڤا میدیا ڕێژەی دەستی کاری کرێکارانی ناوخۆیی لە سێکتەر و پرۆژەکان بۆ تەواوی پارێزگاکانی هەرێمی کوردستان ئاشکرا دەکات.

 

وێنە گەورەکە: حکومەتی هەرێمی کوردستان لە هەوڵدایە زۆرترین دەرفەتی کار بۆ هاووڵاتیان بڕەخسێنێت و دەستی کاری بیانی کەمتر ببێتەوە لە تەواوی ناوەندەکانی حکومی و تایبەتیش، هەروەها بە بڕیاری ژمارە 172ـی ئەنجوومەنی وەزیران، دەبێت 75٪ی دەستی کاری پرۆژەکان کرێکاری ناوخۆیی بن ئەمەش لەپێناو ڕەخساندنی دەرفەتی کارە بۆ هاونیشتمانیان. 

 

چیرۆکی سەرەکی: ڕۆژانە کرێکاران لەکاتی کارکردن لەسەر پرۆژە و باڵەخانەکانی ناوچە و پارێزگاکانی هەرێمی کوردستان تووشی ڕووداوی نەخوازراو دەبن و بەشێکیان گیانیان لەدەست دەدەن، بەشێکیشیان بە سەختی بریندار دەبن و بەتەواوی لە دونیا کارکردن دادەبڕێن.

 

زانیاریی بەدەستهاتوو: بەپێی زانیارییەکانی ئاڤا میدیا، نزیکەی هەزار 400 کرێکارى خۆماڵى، لە شوێنی کرێکارانى بیانى دانراون بەپێى داواکارى و خواستى پڕۆژە جیاوازەکان تا کۆتایی وەرزی یەکەمى ساڵی 2025.

 

- ڕێژەى جێبەجێکردنی بڕیاری 172ـی ئەنجوومەنی وەزیران چەندە؟ 

 

زانیاریی تایبەت: بەگویرەی زانیارییەکانی ئاڤا میدیا، ڕێژەی جێبەجێکردنی بڕیارەکە بەم شێوەیە: 

 

- لە پارێزگای هەولێر 90% جێبەجێکراوە.
- لە پاریزگای سلێمانی 95% جێبەجێکراوە.
- لە پارێزگای دهۆک 91% جێبەجێکراوە.
- بەمەش ڕێژەی دەستی کار لە پرۆژەکان 90%ـیان کرێکاری ناوخۆیین.

 

کۆی گشتیی پرۆژەی دەستەبەرکراو تا کۆتاییەکانی وەرزی یەکەمی ساڵی 2025 لە تەواوی کوردستان. 

- لە هەولێر 25 هەزار و 179 پرۆژە دەستەبەر کراون.
- لە سلێمانی 18 هەزار و 855 پرۆژە دەستەبەر کراون.
- پرۆژەکانی گەرمیان و هەڵەبجە و قەڵادزێ لەگەڵ پرۆژەکانی سلێمانی تۆمار کراون.
- لە دهۆک نۆ هەزار و 670 پرۆژە دەستەبەر کراون.
- لە ئیدارەی سۆران 570 پرۆژە دەستەبەر کراون.

- ژمارەی خانەنشینکروان تا کۆتایی وەرزی یەکەمی ساڵی 2025 

- لە سەرانسەری هەرێمی کوردستان 958 کرێکار خانەنشین کراون.

کۆی گشتیی ئەو کارخوازانەی خۆیان لە سیستمی پۆرتاڵی کار تۆمار کردووە لە مانگی 11ی 2024 تاوەکو مانگی 3ی 2025.

نزیکەی شەش هەزار و 531 کارخواز ناوی خۆیان تۆمار کردووە، نزیکەی هەزار کەس فۆرمی داواکردنی کاری پڕ کردووەتەوە، لەم ماوەیە نزیکەی 100 کەس دامەزراوە.

پارەی کۆکراوە بۆ سندوقی خانەنشینی کرێکاران چەندە؟

- ئاڤا میدیا زانیویەتی پارەی ئەو سندووقە لە یەک ترلیۆن و 340 ملیار و 849 ملیۆن دینار زیاترە.

چۆن مامەڵە لەگەڵ ئەو خاوەنکارانە دەکرێت کە سەرپێچی بەرامبەر کرێکاران دەکەن؟

مەریوان بەگۆک عەزیز، بەڕێوەبەری گشتیی کار و دەستەبەری کۆمەڵایەتی بە ئاڤای ڕاگەیاند: هەر کاتێک خاوەنکار مافی کرێکارەکانی نەپارێزیت، بە پێی یاسای کار توشی سزا دەبێت، کرێکار دەتوانێت لە ڕێگای بەڕێوەبەرایەتییەکانی کار و ڕاهێنان لە پارێزگا و ئیدارە سەربەخۆکان، هەروەها لە ڕێگای هێڵی هۆشیاری 5500 سکاڵا تۆمار بکات و لەڕێگەی لیژنەکانی پشکنین بەدواداچوون بۆ تەواوی کێشەکانیان دەکرێت.