سوودانی سەردانی کەرکووک دەکات

ئاڤا نیوز

 

بۆ دانانی بەردی بناغەی گەورەترین پاڵاوگەی نەوتی و کردنەوەی چەندین پڕۆژەی خزمەتگوزاری و گەشەپێدان، سەرۆکوەزیرانی عێراق ناوەڕاستی ئەم هەفتەیە سەردانی پارێزگای کەرکووک دەکات.

 

ئەوەی پێویستە بیزانیت: ڕێبوار تەها مستەفا، پارێزگاری کەرکوک پێنجشەممەی ڕابردوو ڕەزامەندی محەممەد شیاع سوودانی، سەرۆکوەزیران و وەزارەتی نەوتی فیدڕاڵی بۆ دروستکردنی یەکەم پاڵاوگەی نەوت لە پارێزگاکەدا ڕاگەیاند.

 

زانیاریی بەدەستهاتوو: بەگوێرەی سەرچاوەیەکی ئاگادار لە پارێزگای کەرکووک، کە قسەی بۆ میدیای عێراق کردووە، چاوەڕوان دەکرێت سەردانەکە ڕۆژی دووشەممە بێت و  بۆ دانانی بەردی بناغەی پاڵاوگەی نەوتی، کە بە گەورەترین پاڵاوگە لە جۆری خۆی لە پارێزگاکەدا دادەنرێت، سەرەڕای کردنەوەی پڕۆژەکانی دیکە لە کەرتە جیاوازەکاندا.

 

زانیاریی زیاتر: سەرۆکوەزیران لەمیانی سەردانەکەیدا لەگەڵ بەرپرسانی کۆمپانیای نەوتی باکوور کۆدەبێتەوە، بۆ ئاگاداربوون لە ڕەوتی کارەکان و بەدواداچوونی وردەکارییەکانی گرێبەستی هاوبەش لە نێوان کۆمپانیاکە و هاوتا بەریتانییەکەی (BP) و گفتوگۆکردن لەسەر ڕێگاکانی پەرەپێدانی ژێرخانی وزە لە پارێزگاکەدا.

 

لەلایەکی دیکە: پێشتر بەرپرسانی پارێزگای کەرکووک چەندین وردەکاریان لەسەر پڕۆژەی پاڵاوگەی نوێی پارێزگاکە ئاشکرا کردبوو، کە بە بەهای دوو ملیار دۆلارە و ئامێرەکانی لەلایەن کۆمپانیای UOP ئەمریکی دابین دەکرێت. ماوەی جێبەجێکردنەکەشی لە نێوان دوو تا سێ ساڵدا دەبێت.