سوودانی ملیارێک دینار بۆ هەڵەبجە تەرخان دەکات

ئاڤا نیوز

محەممەد شیاع سوودانی، سەرۆکوەزیرانی عێراق بڕی یەک ملیار دینار بۆ پڕۆژەی "دەروازەی شار" لە هەڵەبجە تەرخان دەکات.

وێنە گەورەکە: دوای سەردانەکەی سەرۆکوەزیران مەسرور بارزانی بۆ هەڵەبجە کە داوای لە حکومەتی عێراق کرد بەدەم داواکارییەکانی خەڵکی پارێزگاکەوە بێت، سوودانی داوای لە بەرپرسانی هەڵەبجە کرد دەرخستەی پڕۆژەیەکی بۆ بنێرن بۆ ئەوەی جێبەجێی بکات، ئەوانیش دەرخستەی پڕۆژەی دەروازەی شاریان بۆ نارد.

بۆچی گرنگە: پڕۆژەی دەروازەی شار یەکێک لە پرۆژە گرنگەکانی هەڵەبجەیە و ساڵانێكە نەخشە و دیزاینی بۆ كراوە، بە جێبەجێکردنی بەشێک لە گرفتی هاتووچۆ لە شارەکە چارەسەر دەبێت.

لێدوانی فەرمی: نوخشە ناسح، قایمقامی هەڵەبجە بە ئاڤا نیوزی گوت: سوودانی بڕی یەک ملیار دیناری بۆ پرۆژەکە تەرخان کردووە و دەست بە جێبەجێکردنی دەکرێت.

زانیاریی زیاتر: بڕیارە  ئەمڕۆ پێنجشەممە ئازاد تۆفیق، پارێزگاری هەڵەبجە بەفەرمی پڕۆژەکە ڕابگەیێنێت.

باکگراوند: ڕۆژی پێنجشەممە 22ی شوبات سەرۆکوەزیران بارزانی سەردانی هەڵەبجەی کرد،  چەند بڕیار و پڕۆژەیەکی بۆ پارێزگاکە ڕاگەیاند و زۆربەی داواکارییەکانی خەڵکی پارێزگاکەی جێبەجێ کرد.