سەرۆکی دەستەی سیاسی سوەیدا: درووزەکان چەکەکانیان ڕادەستی دەسەڵاتدارانی دیمەشق ناکەن

 

ئاڤا نیوز

دوای ئەوەی هێزێکی سەربازی بەناوی ئەنجوومەنی سەربازی سوەیدا دامەزرا، ئێستا بەتەواوی کۆنتڕۆڵی شارەکەیان کردووە و سەرۆکی دەستەی سیاسی سوەیداش دەڵێت " لەم قۆناغەدا ئامادەنین چەکەکانیان ڕادەستی دەسەڵاتدارانی دیمەشق بکەن" .

وێنە گەورەکە: لە ڕۆژانی ڕابردوو، شەڕ لەنێوان چەکدارانی درووز و چەکدارانی سەر بە دەسەڵاتی سووریا لە شارۆچکەکانی جەرمانا و سەحنایا لە پارێزگای ڕیفی دیمەشق و لە چەند ناوچەیەکی شاری سوەیدا ڕوویدا، بەهۆکاری ئەوەی کەسێکی درووز بێڕێزی بە پێغەمبەری ئیسلام (د.خ) کردووە، ئەمەش بووە هۆکاری ئەوەی چەند چەکدارێکی نەناسراو لە دەرەوەی جەرمانا هێرش بکەنە سەر شارەکە و دواتر شەڕەکە بەرفراوان بوو.

لێدوانی فەرمی: جەمال دەروێش، سەرۆکی دەستەی سیاسی سوەیدا بەئاڤا میدیای ڕاگەیاند:

٠ درووزەکانی سووریا بەتایبەتی خەڵکی پارێزگای سوەیدا بەهیچ شێوەیەک متمانەیان بەو هێزە سەربازییە توندڕەوەی دیمەشق نەماوە، چونکە ئەو هێزە هەمان ئەو گرووپە چەکدارەن کەپێشتر لەژێر ناوی تەحریرولشام کاریان دەکرد.

٠ ئێمە هیچ کیشەیەکمان لەگەڵ پێکهاتەکانی دیکەی سووریا بەتایبەتی سوونە مەزهەب نییە، کێشەمان لەگەڵ ئەو ڕەوتە سەلەفییە توندڕەوەیە کە ئێستا بەئارەزووی خۆیان و لەدەرەوەی یاسا و بنەماکانی دەستوور ڕەفتار دەکەن.

قووڵتر: بەگوتەی سەرۆکی دەستەی سیاسی سوەیدا، درووزەکان لەگەڵ یەکپارچەیی خاکی سووریان و داوای سیستمی فیدڕالی لەبەرێوەبردنی وڵات ناکەن، هاوکات چەکدارانی درووز کە ئێستا ئارامی و ئاسایشی سوەیدا دەپارێزن لەم قۆناغەدا و تاوەکو هێزێکی سەربازی نیشتمانی دانەمەزرێت ئامادەنین چەکەکانیان ڕادەستی دەسەڵاتدارانی دیمەشق بکەن.