ئیسرائیل هێزەکانی لە باشووری سووریا بڵاوە پێدەکات

ئاڤا نیوز

سوپای ئیسرائیل بە مەبەستی ڕێگریکردن لە هێزەکانی سەر بە حکومەتی سووریا  بۆ چوونە نێو ناوچە دروزنشینەکان، هێزەکانی لەباشووری ئەو وڵاتە بڵاوە پێدەکات.

وێنە گەورەکە: ناوچە دروزنشینەکانی وەک جەرمانا و سەحنایا لە باشووری دیمەشق و پارێزگای سوەیدا، لە ڕۆژانی ڕابردوودا شەڕی چەکداری پچڕپچڕیان لە نێوان گرووپەکانی سەر بە تایفەکە و هێزە ئەمنییەکان یان گرووپی تر بەخۆوە بینی.

چی ڕوویدا: پێکدادانی نێوان گرووپە چەکدارییەکان و دروزییەکان دەیان کوژراو و برینداری لەنێوان هاووڵاتیان و ئەندامانی هێزە ئەمنییەکان سووریا لێکەوتەوە، هاوکات 35 گەنجی دروزی کاتێک دەچوون بۆ پشتگیریکردنی ئەندامانی تایفەکەیان لە سەحنایا، لە بۆسەیەکدا کوژران. دواتر ئاڵۆزییەکان گەیشتە پارێزگای سوەیدا.

کاریگەریی و لێکەوتەکان: فڕۆکەکانی ئیسرائیل شەوی هەینی 2ـی ئایار نزیکەی 20 هێرشی ئاسمانییان بۆ سەر چەندین ئامانج لە سووریا ئەنجامدا، کە بووە هۆی کوژرانی کەسێک و برینداربوونی چەندانی تر. هەڕەشەی ئەوەشی کرد وەڵامی بەهێزیان دەبێت ئەگەر حکومەتی سووریا ناوچە دروزییەکان نەپارێزێت.

ڕاگەیێنراوی فەرمی: سوپای ئیسرائیل لە ڕاگەیێندراوێکدا ڕایگەیاند، بڵاوبوونەوەی هێزەکانیان لە باشووری سووریا بۆ ڕێگریکردنە لە هاتنی هەر گرووپێکی چەکداری دوژمن بۆ ناوچەی دروزییەکان و بەردەوامن لە چاودێریکردنی پێشهاتەکان، لەگەڵ ئامادەباشی بۆ بەرگری و سیناریۆی جیاواز.

ئەوەی ئێستا ڕوودەدات: تەل ئەڤیڤ بەڵێنەکانی دووبارە کردەوە بۆ پاراستنی دروزەکان لە سووریا، لەسەر بنەمای پەیوەندییە بەهێزەکان لەگەڵ دروزەکانی جۆلان و دروزەکانی ئیسرائیل.