سەرۆکوەزیرانی یەمەن دەست لەکار دەکێشێتەوە

ئاڤا نیوز

ئەحمەد عەواد بن موبارەک، سەرۆکی حکومەتی دانپێندراوی یەمەن بەهۆی زیادبوونی فشاری سیاسی و ناکۆکییە سیاسییەکان بە فەرمی دەستلەکارکێشانەوەی خۆی لە پۆستەکەی ڕاگەیاند.

هۆکارە زانراوەکان: 18 وەزیری حکومەتەکەی ئەحمەد عەواد بن موبارەک یاداشتێکیان واژۆ کرد و داوای دەست لەکارکێشانەوەیان کرد، ئەمەش لەکاتێکدایە کە بارودۆخی ئابووری و ژیانی هاووڵاتیان تا دێت خراپتر دەبێت، هاوکات ناوبراو ناکۆکیی لەگەڵ ڕەشاد علێمی، سەرۆکی ئەنجوومەنی سەرۆکایەتی کۆمار هەیە.

زانیاریی زیاتر: جێگەی سەرنجە ئەحمەد عەواد بن موبارەک لە ساڵی 1968 لە شاری عەدەن لە یەمەن لەدایکبووە، بڕوانامەی ماستەر و دکتۆرای لە کارگێریی کار لە زانکۆی بەغدا بەدەستهێناوە.

ئەوەی پێویستە بیزانیت: لە 5ی شوباتی 2024 پۆستی سەرۆکوەزیرانی وەرگرت، پێشتریش چەندین پۆستی گرنگی هەبووە لەوانەش؛ وەزیری دەرەوە و باڵیۆزی یەمەن لە ئەمریکا.

ئەمەش بزانە: لە ساڵی 2014ەوە شەڕ لەنێوان گرووپی چەکداریی "حووسییەکان" و حکومەتی یەمەنی بەرپا بووە، یەمەن ئێستا دابەش بووە بەسەر چەند ناوچەیەک، حووسییەکان سەنعای پایتەخت و چەند شارێکی دیکەیان کۆنترۆڵ کردووە. هاوکات حکومەتی یەمەن کە لەسەر ئاستی نێودەوڵەتی دانپێندراوە، شارەکانی؛ عەدن کە پایتەختی کاتیی حکومەتە، حەزەرمۆت، جۆف و بەشێکی شارەکانی تەعز، مەهرە، حەججە، مەئرەب و سەعدەی بەدەستەوە ماوە.

لەلایەکی دیکەوە: چەندین گرووپی دیکەی جیاواز کۆنترۆڵی چەندین شار و شارۆچکەیان لە یەمەن کردووە.