شۆفێران لە جۆرێکی سزای هاتووچۆ دەبەخشرێن

ئاڤا نیوز

لە وەزارەتی ناوخۆ جۆرێکی پێبژاردن کە لە کامێراکانەوە تۆمار دەکرێت دەسڕێتەوە، ئەوانەشی گومانیان لە تۆمارکردنی سەرپێچییەکانی هەبێت دەتوانن داواکاری پێداچوونەوە پێشکەش بکەن.

وێنە گەورەکە: لە پێناو سەلامەتی گیانی شوفێر و سەرنشینان و کەمکردنەوەی ڕووداوەکانی هاتوچۆ، جگە لە دانانی کامێراکانی تیژڕۆیی و خاڵ بۆ خاڵ، هەندێک کامێرای دیکەش دانراون بۆ ئەوەی هەر شۆفێرێک لە گڵۆپی سووری دا تۆماری بکات، یان لێخورین بە خێرایی زیاتر لەو خێراییەی کە ڕێگەی پێ دراوە بۆ تێپەڕین لە ترافیک لایت، لەو کاتەی چرای ترافیک لایت سەوزە، یان زیاتر هاتنە پێش و تێپەراندنی هێڵی پەڕینەوەی پیادە لەو کاتە کە گلۆپی ترافیک لایت سوورە. ئیت کامێراکە بۆ ئەم سەرپێچییانەیە.

ئەوەی پێویستە بیزانیت: مەرج نییە هەموو سەرپێچییەک بە ئەنقەست بووبێت، ڕەنگە هەندێک جار شوفێرەکە نەخۆشی لەگەڵ بێت و حاڵەتی خراپ بێت و بیەوێ بەخێرایی بیگەیێنێت بە نەخۆشخانە.

لێدوانی فەرمی: د. هێمن میرانی، بەڕێوەبەری گشتیی دیوان لە وەزارەتی ناوخۆ بە ئاڤای گوت، "هەر کەسێک بەو هۆکارە لە کامێراکانی دابێت، ڕاپۆرتی پزیشکی پێشکەش بکات سزاکانی بۆ دەسڕینەوە."، واتە ئەگەر کەسێک نەخۆشی پێبێت و بەخێرایی بڕوات، لەو کاتەدا کامێراکان سەرپێچییەکە تۆمار دەکەن، بەڵام دواتر شۆفێرەکە بیسەلمێنێت کە نەخۆشی پێبووە و ڕاپۆرتی پزیشکی ببات، ئەوا پێبژاردنەکانی بۆ دەسڕنەوە.

هێمن میرانی دەشڵێت، "هەر چەند ڕۆژێک لەمەوبەر سزایەکمان سڕییەوە کە ویستوویەتی نەخۆش بگەیێنێت بە نەخۆشخانە و لە حەوت کامێرای دابوو، هەموویانمان سڕییەوە. ئەم بڕیارەش لەپێناو پاراستنی سەلامەتی گیانی نەخۆشە".