یاسای بە پارێزگابوونی هەڵەبجە دەچێتە بواری جێبەجێکردنەوە

ئاڤا نیوز

 

بڕیارە ئەمڕۆ دووشەممە (5-5-2025)، یاسای بە پارێزگابوونی هەڵەبجە لە ڕۆژنامەی وەقائیعی عێراقدا بڵاوبکرێتەوە، بەوەش یاساکە بە فەرمی دەچێتە بواری جێبەجێکردنەوە.

 

ئەوەی پێویستە بیزانیت: 14-4-2025 و دوای 12 ساڵ لە دواخستنیی بە هۆکاری جۆراوجۆر، پەرلەمانی عێراق دەنگیدا لەسەر یاسای بەپارێزگابوونی هەڵەبجە، 29ی نیسانیش د. لەتیف ڕەشید، سەرۆککۆماری عێراق واژۆی لەسەر یاساکە کرد و ڕەوانەی وەزارەتی دادی کرد بەمەبەستی بڵاوکردنەوەی لە ڕۆژنامەی وەقائیعی عێراقدا.

 

لێدوانی فەرمی: خالید شوانی، وەزیری دادی عێراق بە پەرلەمانتارانی کوردی ڕاگەیاندووە، ئەمڕۆ دووشەممە (5-5-2025) ژمارەی نوێی ڕۆژنامەی وەقائیعی عێراق بڵاودەکرێتەوە و یاسای بە پارێزگابوونی هەڵەبجە لە ڕۆژنامەکەدا بڵاودەکرێتەوە.

 

ئەمەش بزانە: هەرچەندە لەگەڵ بڵاوکردنەوەی لە ڕۆژنامەی وەقائیعدا یاسای بە پارێزگابوونی هەڵەبجە دەکەوێتە بواری جێبەجێکردنەوە، بەڵام بەشێک لە پەرلەمانتارانی شیعە دەڵێن، دانیشتنی پەرلەمان بۆ دەنگدان بە یاساکە نیسابی یاسایی تەواونەکردووە و تێپەڕاندنی یاساکە نایاساییە، بەوهۆیەش لە دادگای فیدڕاڵی سکاڵایان تۆمارکردووە.

 

خاڵە ئەرێنییەکان: یاسای باری کەسی، لێبووردنی گشتی و گەڕانەوەی زەویش بۆ خاوەنەکانیان هەمان ناکۆکی لەسەر بوو و بەهۆکاری گرفتی یاسایی سکاڵایان لەسەر تۆمارکرابوو، بەڵام دادگای فیدڕاڵی سکاڵاکانی ڕەتکردەوەو هەر سێ یاساکە بەبێ گرفت کەوتنەبواری جێبەجێکردنەوە.