کابینەی ئاسایشی ئیسرائیل فراوانکردنی ئۆپەراسیۆنەکانی لە غەززە پەسەند کرد

ئاڤا نیوز

 

ڕۆیتەرز لە زاری سەرچاوەیەکی ئیسرائیلیەوە ئاشکرایکردووە، کابینەی ئاسایشی بنیامین نەتانیاهۆ، سەرۆکوەزیرانی ئیسرائیل، فراوانکردنی ئۆپەراسیۆنەکانی لە غەززە پەسەند کردووە.

 

وێنە گەورەکە: گرژیی و ئاڵۆزییەکانی غەززە تادێت زیاتر دەبێت و دۆخەکەش بەرەو خراپبوون دەچێت، ئیسرائیل ماوەیەک بوو نیازی فراوانکردنی ئۆپەراسیۆنەکانی لە غەززە خستبووەڕوو، دواجار لە کابینەی ئاسایشی ئیسرائیلەوە بڕیاری لەسەردرا و فراوانکردنی ئەم ئۆپەراسیۆنە بەچەند شێوازێک کاری لەسەر دەکرێت.

 

لێدوانی فەرمی: لیوا ئیال زەمیر، فەرماندەی سوپای ئیسرائیل لە بەیاننامەیەکدا ڕایگەیاند، سوپای ئیسرائیل لە ئێستاوە دەستیکردووە بە دەرکردنی دەیان هەزار فەرمانی بانگهێشتکردن بۆ هێزە یەدەگەکانی، بە مەبەستی فراوانکردنی هەڵمەتی غەززە.

 

زانیاریی بەدەستهاتوو: سەرچاوەکان باسیان لەوە کردووە، پێشبینی دەکرێت پلانەکە تەنیا دوای سەردانەکەی دۆناڵد ترەمپ، سەرۆکی ئەمریکا بۆ ناوچەکە لە هەفتەی داهاتوو جێبەجێ بکرێت، لە هەمان کاتدا هەوڵەکان لەسەر گەیشتن بە ئاگربەست و ڕێککەوتنی بارمتە لەگەڵ حەماس چڕ دەبێتەوە.

 

هاوکات بەرپرسێکی ئیسرائیلی بۆ ڕۆیتەرز ئاشکرای کردووە، ''ئەگەر هەیە ئەم پلانە دەستبەسەرداگرتنی تەواوەتی غەززەش لەخۆ بگرێت''.

 

ئەمەش بزانە: ماوەی زیاتر لە دوو مانگە ئیسرائیل ڕێگەی نەداوە هاوکارییە مرۆیی و پێداویستییە سەرەتاییەکان بچنە نێو کەرتی غەززەوە، کابینەکە ئەم بابەتەشی تاوتوێی کردووە تیایدا پلانی نوێکردنەوەی و گەیاندنی هاوکاری بۆ غەززەش پەسەند کردووە.