کۆمسیۆن بەکارهێنانی ژیریی دەستکرد لە ئامێرەکانی دەنگدان ڕەتدەکاتەوە

ئاڤا نیوز 

کۆمسیۆنی باڵای سەربەخۆی هەڵبژاردنەکانی عێراق ڕەتیدەکاتەوە بۆ هەڵبژاردنی داهاتووی ئەنجوومەنی نوێنەران پشت بە ژیریی دەستکرد ببەستن لە سستمی ئامێرەکانی دەنگداندا.

 

ئەوەی پێویستە بیزانیت: پێشتر حەسەن هادی زایر، ئەندامی تیمی ڕاگەیاندنی کۆمسیۆن، بە ڕۆژنامەی سەباحی ڕاگەیاندبوو: "ئامێری ژماردنی دەنگدان و دەرخستنی ئەنجامەکان چەندین تەکنەلۆژیای ژیریی دەستکردی تێدایە کە بە هەنگاوگەلێک کاردەکات و دەتوانێت مۆری پشتی کاغەزەکە و نیشانەکەی بناسێتەوە. هەروەها جیاوازی دەکات لە نێوان کاغەزی پووچەڵ، مۆرنەکراو و ڕەتکراوەدا.

 

لێدوانی فەرمی: جومانە غەلای، وتەبێژی کۆمسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند: بڵاوکردنەوەی هەواڵی بەکارهێنانی هەر تەکنۆلۆژیایەکی ژیری دەستکرد لە کاری ئامێرەکانی هەڵبژاردن لە ڕۆژی دەنگداندا ڕەتدەکەینەوە.

 

باکگراوند: بڕیارە لە 2025-11-11، هەڵبژاردنی خولی شەشەمی پەرلەمانی عێراق بەڕێوەبچێت، ئامادەکارییەکان لەلایەن کۆمیسیۆنەوە بەردەوامە.