حکومەتی سووریا بکوژی هەڤرین خەلەف دەکاتە فەرماندەی فیرقەی 86

ئاڤا نیوز

وەزارەتی بەرگریی سووریا یەکێک لە سەرکردەکانی گرووپی "ئەحراری شەرقیە" و بکوژی سکرتێری گشتیی بزووتنەوەی داھاتووی کورد لە سووریا، دەکاتە فەرماندەی فیرقەی 86 لە دێرەزوور و حەسەکە و ڕەققە، هاوکات ئەو کەسە لەنێو لیستی سزادراونی ئەمریکایە.

زانیاریی بەدەستهاتوو: بەگوێرەی ڕوانگەی سووری بۆ مافەکانی مرۆڤ، وەزارەتی بەرگریی سووریا، عەمید ئەحمەد ئەلھایس ناسراو بە"حاتەم ئەبو شەقرا" وەک فەرماندەی فیرقەی 86 سوپای عەرەبی سووری دەستنیشان کرد.

زانیاریی زیاتر: حاتم ئەبو شەقرا، کە ناوی ڕاستەقینەی ئەحمەد ئیحسان فەیاز ئەلھایسە، یەکێک لە سەرکردەکانی "ئەحراری شەرقیە"یە، بەرپرسیارە لە تاوانی تیرۆرکردنی هەڤرین خەلەف، سکرتێری گشتیی بزووتنەوەی داھاتووی کورد لە سووریا و شوفێرەکەی بەناوی فەرهاد ڕەمەزان لە تشرینی یەکەمی ساڵی 2019.

لەلایەکی دیکەوە: وەزارەتی گەنجینەی ئەمریکا لە ساڵی 2021، ئەحمەد ئەلھایس و گرووپی "ئەحراری شەرقیە"ـی خستە نێو لیستی سزاکان و ئاماژەی بە "ژمارەیەک پێشێلکاری مافەکانی مرۆڤ" کرد، لەوانە بەڕێوەبردنی زیندانێک لە حەلەب لە ساڵی 2018، کە تێیدا لەسێدارەدانی بەکۆمەڵ بەرامبەر بە سەدان گیراو ئەنجامدراوە.

لەهەمان کاتدا: وەزارەتی گەنجینەی ئەمریکا، تۆمەتی بازرگانیکردن بە ژنان و منداڵانی ئێزدی و تێکەڵکردنی چەکدارانی داعش لەناو ڕیزەکانی "ئەحراری شەرقیە"ـی خستووەتە پاڵ ئەحمەد ئەلھایس و ئاماژەی بەوەکردووە کە "ژمارەیەک لە بەرپرسانی داعش بەیعەتیان پێداوە و بەشدارییان لە پشتگیریکردنی کردەوەکانی باج و سەپاندن کردووە کە گروپەکە سەرکردایەتی دەکات".