سوێد داعشەكانی لە سووریا وەرناگرێتەوە

ئاڤا نیوز

وەزیری دەرەوەی سوێد ئاشکرایکرد، وڵاتەکەی ئەو کەسانە وەرناگرێتەوە کە پەیوەندییان بە داعشەوە کردووە و ئێستا لە کەمپەکانی باکووری سووریان.

لێدوانی فەرمی: تۆپیاس بیلسترۆم، وەزیری دەرەوەی سوێد ڕایگەیاند: وڵاتەکەی هیچ هاوکارییەک پێشکەشی ئەو سوێدیانە ناکات کە پەیوەندییان بە دەوڵەتی ئیسلامی "داعش" کردووە و ئێستا لە کەمپەکانی باکووری سووریا دەستبەسەرن.

زانیاریی زیاتر: حکومەت هیچ گرەنتی گواستنەوەی هاوڵاتییە سوێدییەکان ناکات  کە ئێستا لە باکووری سووریان و سوێد هیچ ئەرکێکی یاسایی لەسەر شان نییە بۆ جوڵەکردن بە ئاراستەی گەڕانەوەیان بە ژن و منداڵەکانیشەوە.

وێنە گەورەکە: لە کەمپەکانی هۆل و ڕۆژ لە باکووری سووریا (ڕۆژئاوای کوردستان) هەزاران چەکداری بەدیلگیراو و کەسوکارەکانیان هەن کە پێش ساڵی 2014 و دواتریش وڵاتەکانیان جێهێشتووە و پەیوەندییان بە داعشەوە کردووە لە سووریا و عێراق، ئیدارەی خۆبەڕێوەبەری ڕۆژئاوای کوردستان چەندین جار داوای لە وڵاتان کردووە پاشماوەی چەکدارانی داعش کە وڵاتینامەی چەندین وڵاتیان هەیە وەربگرنەوە.

باکگراوند: بەگوێرەی ئامارێکی کەناڵی چواری سوێدی، لە کەمپی هۆل پێنج ژن و منداڵی سوێدی هەن، هێزەکانی سووریای دیموکراتیش 10 چەکداری داعشیان دەستگیرکردووە کە خاوەن وڵاتینامەی سوێدن.