ترەمپ: لەماوەی 24 کاتژمێر زانیاریی سەبارەت بە ئاگربەستی غەززە بڵاودەکەینەوە

ئاڤا نیوز

ئەمریکا ئەمڕۆ زانیاری لەبارەی ئەگەری ڕێککەوتنی ئاگربەست لە غەززە و ڕێککەوتنێک بۆ ئازادکردنی بارمتەکان بڵاودەکاتەوە.

وێنە گەورەکە: شەڕی 18 مانگەی غەززە بووەتە پرسی گرنگی جیهان، بۆردومانە بەردەوامەکانی ئیسرائیل بۆ سەر کەرتی غەززە وێرانکاری گەورەی بەدوای خۆیەوە هێناوە، پلانە نوێیەکەی ئیسرائیلیش کە بڕیارە دوای سەردانەکەی ترەمپ بۆ ڕۆژهەڵاتی ناوەڕاست بۆ سەر کەرتەکە جێبەجێی بکرێت نیگەرانییەکی زۆری بەدوای خۆیدا هێناوە.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، لەبارەی ئەگەری ڕێککەوتنی ئاگربەست لە غەززە و ڕێککەوتنێک بۆ ئازادکردنی بارمتەکان لەماوەی 24 کاتژمێردا زانیارییەکان بڵاو دەکەینەوە.

لەلایەکی دیکەوە: سەبارەت بە حووسییەکان ترەمپ وتی، لەگەڵ حووسییەکان ئەنجامێکی باشمان بەدەست هێناوە و ڕێز لە بەڵێنەکانیان دەگرین کە گوتوویانە هێرش ناکەینەوە سەر کەشتییە بازرگانییەکانی ئەمریکا، ئەمەش لەکاتێکدایە حووسییەکان ڕەتیانکردەوە کە خۆیان بەدەستەوە دابێت.

ئەوەی پێویستە بیزانیت: جێبەجێکردنی پلانەکەی ئیسرائیل بۆ غەززە بریتیی دەبێت، لە جێگیر کردنی دەیان هەزار سەربازی یەدەگ بۆ فراوانکردنی هێرشەکان، داگیرکردنی تەواوەتی کەرتی غەززە بۆ ئازاد کردنی بارمتە ئیسرائیلییەکان لەگەڵ گواستنەوەی فەڵەستینییەکان لە باکوورەوە بۆ باشوور، ئەم پلانەش لەلایەن کابینەی ئاسایشی ئیسرائیلەوە پەسەندکراوە.