یەکشەممەی داهاتوو ئێران و ئەمریکا کۆدەبنەوە

ئاڤا نیوز

بە گوێرەی چەند میدیایەکی ئێرانی، لەوانەش ئاژانسی هەواڵی تەسنیم، گەڕی داهاتووی گفتوگۆکانی نێوان ئێران و ئەمریکا ڕۆژی یەکشەممە، 11-5-2025 لە مەسقەتی پایتەختی عومان بەڕێوەدەچێت.

ئەوەی پێویستە بیزانیت: ئێران و ئەمریکا پێشتر سێ جار، دوو جار لە مەسقەت و جارێک لە ڕۆما، سەبارەت بە بەرنامە ئەتۆمییەکەی ئێران کۆبوونەتەوە. لە کۆبوونەوەی ئەمجارەشدا هەر یەکە لە ستیڤ ویتکۆف، نێردەی تایبەتی سەرۆکی ئەمریکا بۆ ڕۆژهەڵاتی ناوەڕاست و عەباس عێراقچی، وەزیری دەرەوەی ئێران، سەرۆکایەتیی شاندی وڵاتەکانیان دەکەن.

زانیاریی بەدەستهاتوو: بە گوێرەی ئاژانسی هەواڵی ئاکسیۆس، ڕۆژی پێنجشەممە، 8-5-2025، دۆناڵد ترەمپ، سەرۆکی ئەمریکا بە شێوەی نهێنی لە کۆشکی سپی لەگەڵ 'ڕۆن دێرمەر'، وەزیری کاروباری ستراتیژیی ئیسرائیل و چەند ڕاوێژکارێکی نزیکی نەتانیاهۆ کۆبووەتەوە و سەبارەت بە ئێران گفتوگۆیان کردووە و لایەنی ئیسرائیلی نیگەرانیی خۆیان لە ئاراستەی دیپلۆماسیی ئەمریکا لە بەرامبەر ئێران نیشان داوە.

لەلایەکی دیکەوە: ترەمپ چەند جارێک ئەوەی دوپات کردووەتەوە کە دەیەوێت بە بێ بەکاربردنی هێرشی سەربازی و لە ڕێگەی ڕێککەوتنەوە پرسی ئەتۆمیی ئێران چارەسەر بکات. ئەمە لە کاتێکدایە بنیامین نەتانیاهۆ، سەرۆکوەزیرانی ئیسرائیل، دەیەوێت بە ڕێگەی سەربازی پرسەکە چارەسەر بکات.