پەرلەمانتارێک: عێراق دەیەوێت بە نەدانی مووچەی هەرێمی كوردستان كورتهێنانی بودجە پڕبكاتەوە

ئاڤا نیوز

ئەندامێكی ئەنجوومەنی نوێنەرانی عێراق ئاشكرای دەكات، عێراق دەیەوێت بە دەستبردن بۆ مووچەی خەڵكی كوردستان ئەو كورتهێنانە پڕبكاتەوە كە بەهۆی دابەزینی نرخی نەوت دروستبووە، بەجێگەی پەنابردن بۆ یەدەنگی بانكی ناوەندی.

وێنە گەورەكە: سەرەرای تێپەڕبوونی 9 ڕۆژ بەسەر مانگی ئایاردا، وەزارەتی دارایی عێراق هێشتا مووچەی مانگی چواری مووچەخۆرانی هەرێمی كوردستانی نەناردووە، ئەوەش لە كاتێكدایە دابەشكردنی مووچەی مانگی پێنجی خانەنشینان و فەرمانبەرانی عێراق دەستیپێكردووە.

هۆكارە زانراوەكان: پێشتر حكومەتی فیدڕاڵی ڕایگەیاندبوو، بەهۆی دابەزینی نرخی بەرمیلێك نەوت بۆ خوار ئەو نرخەی كە لە بودجەی گشتیدا دیاریكراوە، ئاستی كورتهێنان لە بودجەی گشتیدا بەڕێژەیەكی زۆر كەڵەكە دەبێت و گرفت بۆ داهات و خەرجی دروست دەكات.

لێدوانی فەرمی: مەریوان قەرەنی، جێگری سەرۆكی فراكسیۆنی پارتی لە ئەنجوومەنی نوێنەرانی عێراق، لە پێگەی فەرمی خۆی لە فەیسبووک ڕایگەیاند، "سەرەڕای ئەوەی وەزارەتی دارایی هەرێمی كوردستان لەوەتەی 22ـی نیسانی 2025ـەوە لیستی مووچەی مووچەخۆرانی كوردستانی بۆ حكومەتی فیدڕاڵی ناردووە، كەچی تا ئێستا وەزارەتی دارایی عێراق، نەك هەر هیچ بڕە پارەیەكی بۆ مووچەی مانگی چواری فەرمانبەرانی كوردستان نەناردووە، بەڵكو نووسراوی خەرجكردنی پارەی مووچەش لە لایەن وەزارەتی داراییەوە واژۆ نەكرا كە ئەمە جێی نیگەرانییەكی زۆرە.

زانیاریی زیاتر: بەگوتەی ئەو پەرلەمانتارە، حەقیقەتەكە ئەوەیە؛ عێراق پێی حەیفە مووچە بۆ خەڵكی كوردستان بنێرێت و هەر كاتێك داهاتەكانی عێراق كەم دەبێتەوە، لەجیاتی ئەوەی دەست بۆ بەكارهێنانی یەدەگی بانكی ببات، دەست بۆ مووچەی خەڵكی كوردستان دەبات و بەم ڕێگەیە كورتهێنانەكەی پێ پڕ دەكاتەوە، جێی نیگەرانییە كەسانێكیش هەن لە ناوخۆی كوردستان پاساو بۆ دواخستنی مووچە لەلایەن بەغدا دەهێننەوە.