فەرەنسا و پۆڵەندا ڕێککەوتنی بەرگری هاوبەش واژۆ دەکەن

ئاڤا نیوز

فەرەنسا و پۆڵەندا ڕێککەوتن لەسەر ئەوەی بە هاوبەشی ڕووبەڕووی هەر مەترسی و دەستدرێژییەک بۆ سەر وڵاتەکانیان ببنەوە.

چیرۆکی سەرەکی: فەرەنسا و پۆڵەندا ڕۆژی هەینی 2025-05-9، پەیماننامەیەکیان واژۆ کرد کە هەردوولا پابەند دەبن بە هاوکاریکردنی یەکتر لە ئەگەری هێرش و دەستدرێژی لایەنی سێیەم بۆ سەر هەردوو وڵاتەکە.

زانیاریی زیاتر: ڕێککەوتنەکە لە شاری نانسی ڕۆژهەڵاتی فەرەنسا لەلایەن ئیمانوێل ماکرۆن سەرۆکی فەرەنسا و دۆناڵد توسک سەرۆکوەزیرانی پۆڵەندا واژۆ کرا، کە هەردووکیان لە بەهێزترین پاڵپشتیکارانی ئۆکراینان دژ بە لەشکرکێشی ڕووسیا.

لێدوانی فەرمی: ئیمانوێل ماکرۆن ڕایگەیاند، یەکێک لە لایەنە سەرەکییەکانی پەیماننامەکە بڕگەیەکی تایبەتە بە بەرگری لە یەکتر، ئەمە جگە لەو پارێزگاریانەی کە پێشتر ناتۆ و یەکێتی ئەوروپا بۆ فەرەنسا و پۆڵەندا دابینی دەکەن.

لەلایەکی دیکەوە: دۆناڵد توسک ڕاگەیاند، ڕێککەوتنمان لەگەڵ فەرەنسا ڕووداوێکی مێژووییە و پێم وایە فەرەنسا و پۆڵەندا دەتوانن لە هەر بارودۆخێکدا پابەندبن بە ڕێککەوتنەکەی نێوانیان.

ئەمەش بزانە: ئەم جۆرە ڕێککەوتنە بایەخێکی زۆری بۆ پۆڵەندا هەیە، کە سنوورێکی هاوبەشی لەگەڵ ڕووسیا هەیە و چەندین جار هۆشداری داوە کە ئەویش دەکرێت ببێتە ئامانجی دەستدرێژییەکانی ڕووسیا.