لەسەر داوای ترەمپ سەردانی وەزیری بەرگریی ئەمریکا بۆ ئیسرائیل هەڵدەوەشێتەوە

ئاڤا نیوز

 

سەردانی چاوەڕوانکراوی وەزیری بەرگریی ئەمریکا بۆ ئیسرائیل کە بڕیاربوو ڕۆژی دووشەممەی ئەم هەفتەیە ئەنجامبدرێت، هەڵوەشێنرایەوە.

 

وێنە گەورەکە: لەسەروبەندی بڵاوبوونەوەی ئەو ڕاپۆرتانەی باس لە تێکچوونی پەیوەندییەکانی نێوان دۆناڵد ترەمپ، سەرۆکی ئەمریکا و بنیامین ناتانیاهۆ، سەرۆکوەزیارانی ئیسرائیل دەکەن، سەردانی چاوەڕوانکراوی پیت هێگسەس، وەزیری بەرگریی ئەمریکا بۆ ئیسرائیل کە بڕیاربوو ڕۆژی دووشەممە ئەنجام بدرێت، هەڵوەشێنرایەوە، بەرپرسێکی وەزارەتی بەرگریی ئیسرائیل بە میدیاکانی ڕاگەیاندووە کە لەلایەن تیمی وەزیری بەرگریی ئەمریکاوە ئاگادار کراونەتەوە کە سەردانەکە ئەنجام نادرێت.

 

بڵاوکراوەی فەرمی: شۆن بارنێل، وتەبێژی وەزارەتی بەرگریی ئەمریکا لە پلاتفۆرمی ئێکس ڕایگەیاندووە: سەردانی چاوەڕوانکراوی پیت هێگسەس، وەزیری بەرگریی ئەمریکا بۆ ئیسرائیل هەڵنەوەشێنراوەتەوە بەڵکو لەلایەن دۆناڵد ترەمپ، سەرۆکی ئەمریکاوە داوای لێکراوە یاوەری بکات بۆ گەشتەکەی هەفتەی داهاتووی سەرۆک ترەمپ بۆ ڕۆژهەڵاتی ناوەڕاست.

 

ئەوەی پێویستە بیزانیت: بەهۆی پشتگیری مایک واڵتز، ڕاوێژکاری پێشووی ئاسایشی نیشتمانیی ئەمریکا بۆ داوای بنیامین ناتانیاهۆ، سەرۆکوەزیارانی ئیسرائیل بە هێرشکردنە سەر پێگە ئەتۆمییەکانی ئێران، دۆناڵد ترەمپ نەتانیاهۆی تۆمەتبارکرد بە دەستوەردان لە کارەکانی، سەرەڕای ڕەتکردنەوەی تۆمەتەکان لەلایەن سەرۆکوەزیرانی ئیسرائیلەوە، بەڵام بەپێی میدیاکانی ئەمریکا و ئیسرائیل " دۆناڵد ترەمپ لە نەتانیاهۆ توڕەیە".