سەرچاوەیەکی باڵای ئەمریکا بۆ ئاڤا: یەکشەممە لەگەڵ ئێران کۆدەبینەوە

ئاڤا نیوز

سەرچاوەیەکی باڵای ئەمریکا بە ئاڤا میدیای ڕاگەیاند، ڕۆژی یەکشەممە گەڕی چوارەمی دانوستاندنەکانی نێوان ئێران و ئەمریکا لە عومان بەرێوە دەچن.

لێدوانی فەرمی: سەرچاوەیەکی ئاگادار لە شاندی ئەمریکا بۆ ئاڤا میدیا، ستیڤ ویتکۆف، ڕاوێژکاری باڵا و نێردەی تایبەتی سەرۆک ترەمپ بۆ ڕۆژهەڵاتی ناوەڕاست لەگەڵ شاندی یاوەری گەشت دەکات بۆ مەسقەتی پایتەختی عومان و ڕۆژی یەکشەممە چوارەمین گەڕی دانوستانەکانی ئەمریکا لەگەڵ ئێران لەو وڵاتە ئەنجام دەدرێت.

- هاوشێوەی گەڕەکانی پێشوو ئەمجارەشیان گفتوگۆکان بەشێوەی ڕاستەوخۆ و ناڕاستەوخۆ لە نێوان ئەمریکا و ئێران ئەنجام دەدرێت.

ڕاگەیێنراوی فەرمی: تەلەفزیۆنی ڕەسمی ئێرانیش بڵاویکردووەتەوە، عەباس عێراقچی وەزیری دەرەوەی ئێران ڕەزامەندی دەربڕیوە لەسەر پێشنیازی عومان بۆ بەڕێوەچوونی گەڕی چوارەمی دانوستاندنەکان.

ئەوەی پێویستە بیزانیت: قەرار بوو گەڕی چوارەمی دانوستاندنەکان شەممەی ڕابردوو بەرێوەبچن، بەڵام بەهۆکاری لۆجستی دوا کەوتن بۆ یەکشەممەی داهاتوو.

ئەوەش بزانە: ترەمپ چەند جارێک ئەوەی دوپات کردووەتەوە، دەیەوێت بە بێ پەنابردنە بەر هێرشی سەربازی و لەڕێگەی دانوستانەوە پرسی بەرنامەی ئەتۆمیی ئێران چارەسەر بکات. ئەمە لە کاتێکدایە بنیامین نەتانیاهۆ، سەرۆکوەزیرانی ئیسرائیل، دەیەوێت بە ڕێگەی سەربازی پرسەکە چارەسەر بکات.

لەلایەکی دیکەوە: ستیڤ ویتکۆف، نوێنەری ترەمپ بۆ ناوچەکە دەڵێت، هیچ بژاردەیەک لەبەردەم ئێراندا نییە، تەنیا ئەوە نەبێ کە بەمەرجەکانی سەرۆک ترەمپ ڕازی بن.

- ئەگەر ئێران مەرجەکان ڕەتبکاتەوە و بیەوێ ترەمپ تاقی بکاتەوە بۆئەوەی بزانێ تا کەی سەبر دەگرێ، ئەوە هەڵەیەکی گەورە دەکات.

باکگراوند: ئێران و ئەمریکا پێشتر سێ جار، دوو جار لە مەسقەت و جارێک لە ڕۆما، سەبارەت بە بەرنامە ئەتۆمییەکەی ئێران کۆبوونەتەوە.