پاکستان: ئێمە سوپای هیندستانمان بێدەنگ کرد

ئاڤا نیوز

 

دوای ئەوەی ئاگربەستی نێوان هندستان و پاکستان ڕایگەیێنرا، پاکستان پیرۆزبایی لە گەلەکەی کرد و بە سەرکەوتن بەسەر سوپای هیندستان وەسفی کرد.

 

وێنە گەورەکە: دوای چەند ڕۆژێک لە شەڕ و ڕووبەڕبوونەوەی نێوانیان، بە بەکارهێنانی فڕۆکەی جەنگی و چەکی قوورس، دواجار دوانیوەڕۆی ڕۆژی شەممە دۆناڵد ترەمپ، ئاگربەستی نێوان هەردوو وڵاتی ڕاگەیاند، کە 30 وڵات بەشداربوون لەو نێوەدگیرییە و پاکستان ئەمەی بە سەرکەوتن بەسەر هیندستان هەژمار کردووە. 

 

لێدوانی فەرمی: شەهباز شەریف، سەرۆکوەزیرانی پاکستان دوای ئەو ئاگربەستە ڕایگەیاند: ''ئەمە سەرکەوتنێکە نەک تەنیا بۆ سوپای وڵاتەکەمان، بەڵکو بۆ هەموو گەلەکەمان، مێژوو لە بیری ناکات کە چۆن سوپا لە ماوەی چەند کاتژمێرێکدا سوپای هیندستانیان بێدەنگ کرد ".

 

لەلایەکی دیکەوە: شەریف سوپاسی سەرۆکی ئەمریکا و تەواوی ئەو وڵاتانەی کرد کە بەشداربوون لەو نێوەندگیرییە و ڕۆڵیان لە ڕاگەیاندنی ئاگربەستەکەدا هەبووە.

 

لەلایەکی دیکەوە:  دوای چەند کاتژمێرێک لە ڕاگەیاندنی ئاگربەست، هیندستان سوپای پاکستانی بە پێشێلکردنی ئاگربەست تۆمەتبار کرد، بەڵام وەزارەتی دەرەوەی پاکستان هەموو ئەو تۆمەتانەی ڕەتکردەوە پابەندی وڵاتەکەی بۆ ئاگربەست دووپاتکردەوە.