ئێران لە فراوانبوونی شەڕی غەززە دەترسێت و خەمی دامەزراوە ئەتۆمییەکانیەتی

ئاڤا نیوز

ئێران نیگەرانی فراوانبوونی شەڕی غەززەیە و دەترسێت رایبكێشنە ناو شەڕ و ئیسرائیل زیان بە دامەزراوە ئەتۆمییەکانی بگەیێنێت. بۆیە داوای لە حیزبوڵڵای لوبنانی کردووە ڕێگریی لە فراوانبوونی شەڕەکە بکات.

وێنە گەورەکە: بە گوێرەی ڕاپۆرتێکی ڕۆیتەرز، مانگی شوباتی ئەمساڵ، ئیسماعیل قائانی سەردانی بەیرووتی پایتەختی لوبنانی کردووە، لەوێ لەگەڵ حەسەن نەسروڵا، ڕێبەری حیزبوڵای لوبنانی، کۆبووەتەوە. لە کۆبوونەوەکەدا مەترسییەکانی شەڕی ئیسرائیل و حەماس و ئەگەرەکانی فراوانبوونی شەڕەکە تاوتوێ کراون.

 

زانیاریی زیاتر: ئێران ئامۆژگاریی حیزبوڵای کردووە کە ڕێ لە فراوانبوونی شەڕەکە بگرێت، چونکە ئەگەر ئێران بچێتە ناو شەڕەوە، زیان بەر دامەزراوە ئەتۆمییەکانی دەكەوێت. لە بەرامبەردا حیزبوڵا بە ئێرانی گوتوە کە نایەوێت ئێران بچێتە ناو شەڕەوە لەگەڵ ئیسرائیل یان ئەمریکا، بەڵام لەگەڵ ئەوەشدا ئەو شەڕی خۆی لە دژی ئیسرائیل درێژە پێدەدات. 

ئەوەی پێویستە بیزانیت: لەوەتەی شەڕی ئیسرائیل و حەماس لە حەوتی ئۆکتۆبەری ساڵی ڕابردووەوە دەستی پێکرەوە، بەرپرسانی سوپای قودس و حیزبوڵڵای لوبنانی لانیکەم سێ جار کۆبوونەتەوە. 

ژمارەکان وا دەڵێن: بە هۆی هێرشەکانی ئیسرائیلەوە تا ئێستا زیاتر لە 200 چەکداری حیزبوڵا و 50  سڤیل لە لوبنان کوژراون. بە هۆی هێرشەکانی حیزبوڵاشەوە نزیکەی 12 سەربازی ئیسرائیلی و شەش سڤیل لە ئیسرائیل کوژراون.