ئامادەکردنی لیستی مووچەی مانگی پێنج دەستیپێکرد

ئاڤا نیوز

 

وەزارەتی دارایی و ئابووری هەرێمی کوردستان، سەرجەم وەزارەت و دەستە و فەرمانگەکانی ئاگادارکردووەتەوە بەزووترین کات لیستی مووچەی مانگی پێنج تەواو بکەن و بینێرن، تاوەکو کار لەسەر ئەوە بکرێت لیستی مووچە بە سیستمی پەیرۆڵ ئامادەکرێت و لە کاتی خۆیدا بنێردرێت بۆ بەغدا.

 

وێنە گەورەکە: ئەمڕۆ دابەشکردنی مووچەی مانگی چوار تەواو دەبێت و دەست بە ئامادەکاری لیستی مووچەی مانگی پێنج دەکرێت و کۆتایی ئەم هەفتەیە یان سەرەتای هەفتەی داهاتوو لیستەکە ڕەوانەی بەغدا دەکرێت.

 

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤا میدیای ڕاگەیاند، "لە ڕۆژی پێنجشەممەی رابردووەوە هەموو وەزارەت و فەرمانگە و دەستەکان ئاگادارکراون، لیستی مووچەی فەرمانبەرەکانیان ئامادە بکەن و بینێرن بۆ وەزارەتی دارایی."

 

زانیاریی زیاتر: بەگوتەی ئەو سەرچاوەیەی وەزارەتی دارایی، ئەمڕۆ لیستەکان لە وەزارەتی دارایی کۆدەکرێنەوە و لە چوارچێوەی سیستمی پەیرۆڵدا یەکدەخرێت و لیستەکە ئامادە دەکرێت و دوای وردبینی ڕەوانەی بەغدای دەکرێت.

 

لەلایەکی دیەکەوە: لەبارەی تەرازووی پێداچوونەوە و داهاتی ناوخۆش، سەرچاوەیەکی دیکە لە وەزارەتی دارایی گووتی، ئامادەکردنی ئەوانیش دەستیپێکردووە و هەوڵ دەدەین ئەم هەفتەیە هەرسێ ئەرکەکەی هەرێمی کوردستان لەبارەی مووچە جێبەجێ بکەین و چاوەڕێی بەغدا دەکەین بە زووترین کات پارەی مووچە خەرجبکات بۆئەوەی بەر لە جەژن مووچەی مانگی پێنج دابەش بکەین.